«جاس دارىن» بايقاۋى ءوتتى

جاس اۆتورلاردىڭ تاڭداعان تاقىرىبىنا, كوركەمدىك تالعامى مەن وي ەركىندىگىنە, سۋرەتكەرلىك شەبەرلىگىنە تاڭعالماسقا بولمايدى. كۇردەلى كومپوزيتسياعا قۇرىلعان كەيبىر دۇنيەلەر ءتىپتى بالا ەمەس, قۇددى تاجىريبەلى كاسىبي شەبەر جاساپ شىققانداي ەرەكشە كوز تارتادى. جاستار شى­عارماشىلىعىنداعى جاڭا­شىل­دىقتى قازىلار القاسىنىڭ مۇشەلەرى دە اتاپ ءوتىپ, دارىندى بالالاردىڭ ىشىندە كەلەشەگىنەن زور ءۇمىت كۇتتىرەتىن شەبەرلەردىڭ از ەمەس ەكەنىن ايتتى.

– جاس قولونەرشىلەردىڭ شى­عارماشىلىققا قاساڭ تۇرعىدا ەمەس, كەڭ ويلاپ, كرەاتيۆتى كوز­قاراسپەن جول سالىپ جاتقانى بايقالادى. كەيبىر بالعىنداردىڭ جاساعان دۇنيەسى ءبىزدى دە ءتانتى ەتتى. بۇل بايقاۋعا قاتىسقان وقۋشىلاردىڭ ءبارى بولاشاقتا سۋ­رەتشى بولماۋى مۇمكىن. بىر­اق كەمەلى تولىسقان كاسىبي مامان بولىپ قالىپتاسارى انىق. جالپى, مەملەكەت باسشىسى قاسىم-جومارت توقاەۆتىڭ 2022 جىلدى بالالار جىلى دەپ جاريا­لاپ, قوعامدى ۇرپاق تاربيەسىنە, بالانىڭ قابىلەت-دارىنىن ۇش­تاۋ, دامىتۋ, ىنتالاندىرۋ ماسە­لەلەرىنە باعىتتاعانى وتە قۇپ­تارلىق باستاما بولدى, – دەدى قازاقستان سۋرەتشىلەر وداعىنىڭ مۇشەسى الەكساندر زاحارچەنكوۆ.

بايقاۋعا شالعاي اۋىلداردان كەلگەن بالا شەبەرلەردىڭ دە قولونەرگە دەگەن تالابى مىقتى. مىسالى, امانگەلدى اۋىلىنداعى جالپى ءبىلىم بەرەتىن مەكتەپتىڭ 8-سىنىپ وقۋشىسى ايشا ابىل­عازى «قىز جاساۋى» اتتى كومپوزيتسياسىن الىپ كەلىپتى.

– امانگەلدىدەگى «شۇعىلا» بالالار جانە جاسوسپىرىمدەر شىعارماشىلىق ورتالىعىنىڭ شاكىرتىمىن. ىسمەرلىكپەن اينالىسىپ جۇرگەنىمە 3 جىل بولدى. قولونەر ۇيىرمەسىنە 25-30 شاقتى قىز بالا بارمىز. الدىمەن اۋداندىق بايقاۋعا قاتىسىپ, باس جۇلدەنى ۇتىپ الدىم. ەندى مىنە, وبلىستىق بايقاۋدىڭ جۇلدەسىنەن دە ءۇمىتتىمىز. «جاس دارىنعا» 2019 جىلى دا كەلىپ, ەكىنشى ورىنعا يە بولعانمىن. مۇندا اكەلگەن كومپوزيتسيامىز قازاقتىڭ قىز ۇزاتۋ راسىمىندە پايدالانىلاتىن 8 ءتۇرلى تۇرمىستىق بۇيىمنان تۇرادى. ۇستازىم نۇرسۇلۋ مەي­رام­بەكقىزىنىڭ كومەگىمەن 5-6 ايدىڭ ىشىندە جاساپ شىقتىم, – دەدى جاس دارىن.

ايشانى كونكۋرسقا الىپ كەلگەن «شۇعىلا» بالالار جانە جاسوسپىرىمدەر شىعارماشىلىق ورتالىعىنىڭ جەتەكشىسى ەربول قويشىباەۆتىڭ ايتۋىنشا, امان­گەلدى اۋدانىندا بالالارعا ارنالعان بەس باعىتتى قامتيتىن 36 ۇيىرمە جۇمىس ىستەيدى ەكەن.

– وبلىستىق «جاس دارىن» بايقاۋى 8 نوميناتسيا بويىنشا ءوتىپ جاتىر. سول 8 اتالىمعا ءبىر-بىردەن سەگىز جۇمىس اكەلىپ وتىرمىز. اۋداندىق كەزەڭدە جەڭىپ شىققان ەكى شاكىرتىمىز قاتىسىپ جاتىر. ماسەلەن, ءبىرىنشى نوميناتسياعا ويۋ-ورنەكپەن اشەكەيلەنگەن ۇلت­تىق كيىم ۇلگىلەرىن الىپ كەلدى. مۇنى دا ءوزىمىزدىڭ تىگىن ۇيىرمەسىنە قاتىساتىن شاكىرتتەرىمىز تىككەن. اۋىلدا ۇل بالالارعا قولونەردەن ساباق بەرەتىن جاسۇلان نۇرباەۆ دەگەن اعامىز بار. كورمە-بايقاۋعا سول كىسىنىڭ شاكىرتتەرى كيىزۇيگە ۇقساتىپ جاساعان بولاشاقتاعى زا­ماناۋي مەكتەپتىڭ ماكەتىن دە اكەپ وتىرمىز, – دەدى ورتالىق باسشىسى.

بايقاۋدا ساندىك-قولدانبالى ونەر مەن كوركەم-ەستەتيكالىق باعىتتاعى شىعارماشىلىق ۇيىر­مە­لەرگە قاتىساتىن بالالار­دىڭ 104 جۇمىسى كوپشىلىك نازارىنا ۇسىنىلدى. جاس شەبەرلەردىڭ ۇلتتىق ويۋ-ورنەكپەن بەزەندىرىل­گەن بۇيىمدارى كوبىنە توقىما, اعاش, يتتەمىر, سۇيەك, تەرى, ساز, سابان قاعازدان جاسالعان.

بالالار بايقاۋى وبلىستىق ءبىلىم باسقارماسىنا قاراستى پسي­حولوگيالىق قولداۋ جانە قوسىم­شا ءبىلىم بەرۋ وڭىرلىك ورتالى­عىنىڭ مۇرىندىق بولۋىمەن ءوتتى.

– بىلتىر وسى بايقاۋدىڭ رەسپۋبليكالىق كەزەڭىندە بەيىم­بەت مايلين, جىتىقارا, قوستاناي اۋدانىنىڭ وقۋشىلارى جەڭىمپاز اتاندى. بيىل دا مىقتىلار قا­تارىنان كورىنەمىز دەپ ويلايمىز. ويتكەنى بايقاۋدىڭ 7 اتالىمىنا كومپيۋتەرلىك ديزاين دەگەن تاعى ءبىر نوميناتسيا قوستىق. ءسويتىپ, سەگىز باعىت بويىنشا جۇ­مىستار ۇسىنىلىپ وتىر. وڭىردە كوركەم-ەستەتيكالىق باعىتتاعى ۇيىرمەلەردە 3,5 مىڭنان استام بالا ءتالىم الادى. بۇل بايقاۋ سول ۇيىرمەلەردىڭ جۇمىس ناتيجەلەرىن قورىتىندىلاۋ ماقساتىندا ۇيىم­­­داستىرىلدى, – دەيدى وڭىر­­لىك ور­تالىقتىڭ ديرەكتورى ەلەنا پەترەنكو.

بايقاۋ بارىسىندا وڭىرگە بەلگىلى قولونەر شەبەرلەرى مەن كاسىبي سۋرەتشىلەر ارنايى شەبەر­لىك ساعاتتارىن وتكىزدى. «جاس دارىن» كونكۋرسىندا دارالانعان جەڭىمپازداردىڭ شىعارمالارى الداعى 12-14 قازاندا وتەتىن «ال­تىن قازىنا» رەسپۋبليكالىق كور­مەسىنە قويىلادى.

قوستاناي وبلىسى