شىمكەنتتىك پوليتسەي كوپىردەن سەكىرمەك بولعان ەر ادامدى قۇتقارىپ قالدى, دەپ حابارلايدى Egemen.kz Polisia.kz سايتىنا سىلتەمە جاساپ.
895 جاياۋ باعىتتاعى پاترۋلدىك پوليتسيا پولكىنىڭ قىزمەت ينسپەكتورى اناروۆ جانە تولە بي كوشەلەرىنىڭ قيىلىسىندا قىزمەت اتقارۋ بارىسىندا جەرگىلىكتى تۇرعىن كومەك سۇرايدى.
ايتۋىنشا, سول ماڭداعى قاپال باتىر كوشەسىندەگى كوپىردەن ەر ادام ءوز-وزىنە قول جۇمساماق بولىپ, كوپىردىڭ جاقتاۋىندا سەكىرگەلى تۇرعانىن كورگەن. اتالعان جايت كۇندىزگى ۋاقىتتا بولعان. بۇل جاعدايعا بەي-جاي قاراماعان ءتارتىپ ساقشىسى دەر كەزىندە وقيعا ورنىنا جەتكەن.
ەر ادامنىڭ كوپىر جاقتاۋىنا شىعىپ, سەكىرۋگە وقتالعانىن كورەدى. ونى سوزگە تارتا وتىرىپ, جەدەل ارەكەت ەتىپ, جانىنا جاقىنداپ قاۋىپسىز جەرگە شىعارادى. وسى وقيعا پوليتسەيدىڭ بەينەجەتونىنا جازىلعان. سونداي-اق جەدەل باسقارۋ ورتالىعىنىڭ بەينەباقىلاۋ كامەرالارىندا ازامات الدىمەن جولدا ءجۇرىپ جاتقان كولىكتەردىڭ استىنا تۇسپەكشى بولعانى بەلگىلى بولدى.
«كۇندەلىكتى جۇمىسقا كەلگەندە ءبىرىنشى ويىم - قوعام تىنىشتىعىن ساقتاپ, ادامداردىڭ قاۋىپسىزدىگىن قامتاماسىز ەتۋ. قىزمەت بارىسىندا مەندە مۇنداي جاعداي ءبىرىنشى رەت ورىن الىپ وتىر. مەنەن كومەك سۇراعاندا, بىردەن ول ادام مەن جەتكەنشە جامان قادامعا بارماي, ءومىرىن قۇتقارىپ قالسام ەكەن دەگەن نيەت بولدى. اللاعا شۇكىر, ازاماتتى قۇتقارىپ ۇلگەردىك, ول ءدىن امان», دەدى پوليتسەي جانبولات تاستاحوۆ.
ومىرىمەن قوش ايتىسپاق بولعان ازاماتتان ءمان-جايدى انىقتاۋ ءۇشىن ەڭبەكشى اۋدانى پوليتسيا باسقارماسىنا جەتكىزىلىپ, ۇيىنە قايتارىلدى. پوليتسيا قىزمەتكەرلەرى جەدەل ارەكەتتەرىنىڭ ارقاسىندا تۇرعىننىڭ ءومىرىن قۇتقارىپ قالدى.