تەگەراننان جاقسى جاڭالىق كۇتەمىز

اتالعان جارىس بۇرىن AVC كۋبوگى دەپ اتالاتىن. وعان ازيادان بولەك, اۋستراليا مەن مۇحيت جاعالاۋىندا ورنالاسقان مەملە­كەتتەردىڭ وكىلدەرى دە قاتىساتىن. ءالى ەسىمىزدە, 1993 جىلى تايلاندتىڭ ناكحونراتچاسيما قالاسىندا جالاۋى جەلبىرەگەن جارىستا الماتىنىڭ «ازاماتى» تابىستى ونەر كورسەتىپ, كۇمىس مەدال يەلەندى. جارتىلاي فينالدا جاپونيانىڭ جىگىتتەرىن جەڭگەن جەرلەستەرمىز اقتىق سايىستا وڭتۇستىك كورەيانىڭ ورەندەرىنە ەسە جىبەردى. جۇلدىزدى كوماندانىڭ ساپىندا باقىتجان بايتورەەۆتىڭ جاسىنداي جارقىلداعانى دا كۇنى كەشەگىدەي كوز الدىمىزدا. ءدال سول جىلى قازاقتىڭ ۇلى ازيانىڭ ەڭ ۇزدىك ويىنشىسى اتانعان ەدى. تاريحقا جۇگىنسەك, باقىتجانعا دەيىن دە, باقىتجاننان كەيىن دە مۇنداي اتاق قازاقستاننىڭ بىردە-ءبىر ۆولەيبولشىسىنا بۇيىرعان ەمەس. 

1999 جىلدان بەرى ازيانىڭ كلۋبتىق چەمپيوناتى دەربەس رەسمي جارىس رەتىندە وتە باستادى. سول كەزدەن بەرى 22 مارتە ۇيىم­داستىرىلعان ءدۇبىرلى دودادا يراننىڭ ۆولەيبولشىلارى ەڭ ۇلكەن ناتيجەگە قول جەتكىزدى. پارسى ەلىنىڭ وكىلدەرى 15 رەت باس جۇلدەنى ولجالادى. وڭتۇستىك كورەيا وعلاندارى ەكى رەت وزسا, قىتاي, قازاقستان, قاتار جانە تايپەيدەن كەلگەن كوماندالار ءبىر-ءبىر رەتتەن توپ جاردى. وزگە مەملەكەتتىڭ ورەندەرىنە ونداي باق بۇيىرمادى. ال جەكەلەگەن كلۋبتار جايىندا ايتار بولساق, سارى قۇرلىقتا تەگەراننىڭ «پايكانىنا» تەڭ كەلەر ەشكىم جوق. ولار جەتى جارىستا جەڭىمپاز اتاندى. تەدجوننىڭ «سامسۋنگ ينشۋرەنسى» مەن تەگەراننىڭ «سارمايە بەنكسى» ەكى رەتتەن دارا شىقتى.

قازاقستاندىق كوماندالاردىڭ جالعىز باس جۇلدەسى «راحاتتىڭ» ەنشىسىندە. 2005 جىلى پاكىستاننىڭ يسلاماباد قالاسىندا ۇيىمداستىرىلعان جارىستا الماتىلىقتار الدارىنا جان سالمادى. فينالدا ولار تەگەراننىڭ «سايپاسىن» سان سوقتىردى. وتانداستارىمىز تاعى ءتورت رەت اقتىق سىندا ونەر كورسەتتى. 2006 جىلى «راحات», 2008 بەن 2011 جىلدارى «الماتى» جانە 2018 جىلى «اتىراۋ» شەشۋشى تۇستا يراندىقتاردان ۇتىلىپ, كۇمىس مەدال يەلەندى. سونداي-اق 2002 جانە 2004 جىلدارى «اتىراۋ» مەن 2021 جىلى الماتىنىڭ «بۋرەۆەستنيگى» قولا جۇلدەنى قورجىنعا سالدى.

بىلتىر تايلاندتىڭ ناكحونرات­چاسي­ماسىندا «بۋرەۆەستنيك» قولا مەدال يەلەن­گەنىن جوعارىدا ايتتىق. بۇل ءتۋرنيردىڭ باس جۇلدەسى يراننىڭ «فۋلاد سيردجانىنا» بۇيىردى. فينالدا ولار قاتاردىڭ ء«ال-ارابيىنەن» باسىم ءتۇستى. بىراق «سارى قۇرلىق­تىڭ باستى جارىسىندا قولا الدىق» دەپ كەۋ­دە قاعىپ, ارقانى كەڭگە سالۋعا بولمايدى. ويتكەنى پاندەمياعا بايلانىستى جاپونيا مەن قىتايدىڭ ەڭ مىقتى ۇجىمدارى اتالعان دوداعا قاتىسپاعانىن ەسكەرگەن ءجون. ولاردان بولەك, اۋستراليا, ۆەتنام, تايپەي, ءۇندىستان جانە گونكونگتىڭ دا وكىلدەرى تاي ەلىندە بوي كورسەتكەن جوق.

سوڭعى جىلدارى ايەلدەر اراسىنداعى ازيانىڭ كلۋبتىق چەمپيوناتىندا قازاق­ستانننىڭ ۆولەيبولشىلارى ۇستەمدىك قۇرىپ ءجۇر. بىلتىر تايلاندتا وسكەمەننىڭ «التايى» التىننان القا تاقسا, بيىل سەمەيدە پەتروپاۆلدىڭ «قۋانىشى» قارسىلاس شاق كەلتىرمەدى. ەندى ءبىز بۇرىمدىلاردىڭ جەڭىستى جولىن بورىكتىلەر جالعاستىرسا دەپ تىلەيمىز. تەگەرانداعى تارتىستا «تاراز» دا جەڭىس تۇعى­رىنا كوتەرىلسە, نۇر ۇستىنە نۇر بولار ەدى...

سەنبىدە «تاراز» قاتاردىڭ ء«ال-رايا­نىمەن» كۇش سىناستى. كەشە يراكتىڭ «ەربي­لىمەن» شە­بەرلىك بايقاستى. بۇگىن يراننىڭ «م.شاح­باد يەزدىمەن» سايىسقا تۇسەمىز. كەلەسى توپتا جا­پونيانىڭ «وساكا», تايلاندتىڭ «ناكحون­راتچاسيما», يراكتىڭ «سوۋت گاس كلاب» جانە يراننىڭ «پايكان» كلۋبتارى ونەر كورسەتۋدە. جارىستىڭ جەڭىمپازى مەن جۇلدەگەرلەرى 20 مامىردا انىقتالادى. ازيانىڭ ەڭ ۇزدىك ۇجىمى بيىل كۇزدە شىمىلدىعى تۇرىلەتىن الەمنىڭ كلۋبتىق چەمپيوناتىنا قاتىسادى.