ورتالىق رەفەرەندۋم كوميسسياسى اقپارات جانە قوعامدىق دامۋ مينيسترلىگىمەن بىرلەسە وتىرىپ, رەفەرەندۋمعا دايىندىق جانە ونى وتكىزۋ ماسەلەلەرى بويىنشا بۇقارالىق اقپارات قۇرالدارىنىڭ باس رەداكتورلارىنا ارنالعان وقىتۋ سەمينارىن وتكىزدى.
وفلاين جانە ونلاين فورماتتا ۇيىمداستىرىلعان جيىنعا رەسپۋبليكالىق جانە وڭىرلىك بۇقارالىق اقپارات قۇرالدارىنىڭ باس رەداكتورلارى, ىشكى ساياسات باسقارمالارىنىڭ قىزمەتكەرلەرى قاتىستى.
ءىس-شارا بارىسىندا 2022 جىلعى 5 ماۋسىمعا تاعايىندالعان رەسپۋبليكالىق رەفەرەندۋم تۋرالى, «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» قر زاڭىنىڭ جوباسى, رەسپۋبليكالىق رەفەرەندۋمدى دايىنداۋ مەن وتكىزۋ, ازاماتتاردى حاباردار ەتۋ, ۇگىت, قوعامدىق پىكىرگە سۇراۋ سالۋ, باق وكىلدەرىن اككرەديتتەۋ, رەسپۋبليكالىق رەفەرەندۋمدى قارجىلاندىرۋ, سونداي-اق رەفەرەندۋم تۋرالى زاڭنامانى بۇزعانى ءۇشىن جاۋاپكەرشىلىك ماسەلەلەرى بويىنشا تۇسىنىكتەمەلەر بەرىلدى.
سەميناردىڭ سپيكەرلەرى رەتىندە ورتالىق رەفەرەندۋم كوميسسياسى تاراپىنان ورتالىق رەفەرەندۋم كوميسسياسىنىڭ حاتشىسى مۇحتار ەرمان, ورك مۇشەلەرى سابيلا مۇستافينا, اناستاسيا ششەگورتسوۆا ءسوز سويلەدى.
جيىن بارىسىندا سونىمەن قاتار ادىلەت ۆيتسە-ءمينيسترى الما مۇقانوۆا كونستيتۋتسياعا ەنگىزىلەتىن وزگەرىستەر تۋرالى اڭگىمەلەپ بەردى. ونىڭ ايتۋىنشا, حالىقتىق تالقىعا ۇسىنىلاتىن جاڭا قۇجاتتى قابىلداۋدىڭ ماڭىزى زور.
«الداعى ۋاقىتتا پرەزيدەنتتىڭ جاقىن تۋىستارى ءۇشىن ساياسي لاۋازىمدار مەن كۆازيمەملەكەتتىك سەكتوردا باسشىلىق لاۋازىمداردى اتقارۋعا شەكتەۋ قويىلادى. سونىمەن قاتار پرەزيدەنتتىڭ ءوز وكىلەتتىكتەرىن جۇزەگە اسىرۋ كەزەڭىندە ساياسي پارتيا مۇشەسى بولۋىنا تىيىم سالىناتىنى بۇعان دەيىن دە حابارلانعان بولاتىن. وسى وزگەرىستەردىڭ ماڭىزى زور ەكەنى راس», دەدى الما مۇقانوۆا.
اقپارات جانە قوعامدىق دامۋ ۆيتسە-ءمينيسترى نۇرگۇل ماۋبەرلينوۆا ءوز سوزىندە بۇقارالىق اقپارات قۇرالدارى كەز كەلگەن ۇيىم نە كومپانيانىڭ رەفەرەندۋمعا قاتىستى ماتەريالىنا ارنايى بەلگى سوعىلۋى ءتيىس ەكەنىن جەتكىزدى.
باس پروكۋروردىڭ اعا كومەكشىسى ازامات سارعازين رەفەرەندۋم كەزىندە بۇقارالىق اقپارات قۇرالدارىنا قانداي جاۋاپكەرشىلىك جۇكتەلەتىنىنە توقتالدى. ونىڭ ايتۋىنشا, مەديا وكىلدەرىنىڭ رەفەرەندۋمعا قاتىستى زاڭ بۇزباۋى وتە ماڭىزدى.
سەمينار سوڭىندا ورتالىق رەفەرەندۋم كوميسسياسىنىڭ جانە ۋاكىلەتتى مەملەكەتتىك ورگانداردىڭ وكىلدەرى سەمينارعا قاتىسۋشىلاردىڭ سۇراقتارىنا جاۋاپ بەردى.