تايلاندتىڭ باس شاھارى – بانگكوكتا كوگالداعى حوككەيدەن ەرلەر اراسىنداعى ءحىح جازعى ازيا ويىندارىنىڭ ىرىكتەۋ ءتۋرنيرى اياقتالدى. اتالعان جارىستا توعىز كوماندا كۇش سىناستى. وكىنىشكە قاراي, جەرلەستەرىمىز تاي ەلىندە تىم سۇرەڭسىز ونەر كورسەتىپ, ءوز جانكۇيەرلەرىن جەرگە قاراتتى. العاشقى اينالىمداردا الاڭ يەلەرى مەن ومانعا ەسە جىبەرگەن ولار ءۇشىنشى تۋردا وزبەكستانمەن تەڭ وينادى. ودان كەيىن گونكونگتان ۇتىلدى. سوڭعى ماتچتاعى ساتسىزدىك قازاقستان قۇراماسىن ازيادادا ونەر كورسەتۋ مۇمكىندىگىنەن ايىردى.
ءيا, جوعارىداعى جاعداي جانكۇيەرلەردىڭ كوڭىلىنە سەلكەۋ تۇسىرگەنى راس. ويتكەنى كەزىندە كوگالداعى حوككەي قازاقستاندا كەرەمەت قارقىنمەن دامىعانىن كوزىقاراقتى وقىرماندار جاقسى بىلەدى. جەر شارىنىڭ التىدان ءبىر بولىگىن باۋىرىنا باسقان كەڭەس وداعىندا الماتىنىڭ «ديناموسىنا» تەڭ كەلەر كوماندا جوق ەدى. ناقتى دەرەكتەرگە سۇيەنسەك, 1970-1991 جىلدار ارالىعىندا كسرو چەمپيوناتىنىڭ جالاۋى 22 مارتە جەلبىرەسە, جەرلەستەرىمىز سول جارىستاردىڭ 18-ىندە جەڭىمپاز اتاندى. تەك 1970, 1971, 1974 جىلدارى ۋليانوۆسكىنىڭ «ۆولگاسى» مەن 1980 جىلى سۆەردلوۆسكىنىڭ سكا-سىنا جول بەرىپ, كۇمىس مەدالدى قاناعات تۇتتى. وداق كۋبوگىن بەس رەت توبەسىنە كوتەردى. ەۋروپا چەمپيوندارى كۋبوگىن ەكى مارتە ولجالاپ, تاعى ءبىر رەت قولا جۇلدەنى قورجىنعا سالدى.
ال ەۋروپا چەمپيوندارى كۋبوگىنىڭ تۇساۋى 1974 جىلى نيدەرلاندتىڭ ۋترەح قالاسىندا كەسىلگەن ەكەن. 1991 جىلعا دەيىن بۇل ءتۋرنيردىڭ شىمىلدىعى 18 مارتە ءتۇرىلدى. كسرو-نىڭ وكىلدەرى اراسىنان تەك «دينامونىڭ» عانا ءدۇبىرلى دودادا دارا شىعۋعا كۇش-جىگەرى جەتتى. 1982 جىلى فرانتسيانىڭ ۆەرسالى مەن 1983 جىلى نيدەرلاندتىڭ گااگاسىندا الماتىلىقتار الدارىنا جان سالمادى. سونداي-اق توپ جارعاندار قاتارىندا گەرمانيا (7 رەت), انگليا مەن نيدەرلاندتىڭ (4 رەتتەن) جانە يسپانيانىڭ (1 رەت) كلۋبتارى بار. 1985 جىلى گەرمانيانىڭ فرانكەنتال قالاسىندا ۇيىمداستىرىلعان جارىستا «دينامونىڭ» ويىنشىلارى قولا مەدالدى مويىندارىنا ءىلدى.
سپورتسۇيەر قاۋىم اتاعى الىسقا جايىلعان «دينامونىڭ» جارقىن جەڭىستەرىنىڭ بارلىعىن ەدۋارد ءايريحتىڭ ەسىمىمەن تىعىز بايلانىستىرادى. ارينە وعان ەشكىم داۋ ايتا المايدى. 1964 جىلى پوۆولجەدەن قازاقستانعا قونىس اۋدارعان ول اۋەلى رەسپۋبليكامىزدا دوپتى حوككەيدىڭ وركەندەۋىنە ولشەۋسىز ۇلەس قوستى. ايريح پەن قازىبەك بايبولوۆتىڭ تۇسىندا الماتىنىڭ «ديناموسى» كسرو چەمپيوناتىندا 1 التىن, 4 كۇمىس جانە 4 قولانى ولجالادى. ءبىر رەت ەۋروپا چەمپيوندارى كۋبوگىن جەڭىپ الدى. كەيىننەن ەدۋارد فەرديناندوۆيچ كوگالداعى حوككەيگە تۇبەگەيلى بەت بۇردى. ال سپورتتىڭ بۇل تۇرىنەن قول جەتكىزگەن تابىسىمىز جايىندا جوعارىدا باياندادىق.
كوگالداعى حوككەي وليمپيا ويىندارىنىڭ باعدارلاماسىنا سوناۋ 1908 جىلى ەندى. سول ارالىقتا كسرو قۇراماسى ءبىر رەت قانا جۇلدەگەرلەر قاتارىنا قوسىلدى. 1980 جىلى ماسكەۋ وليمپياداسىندا وداقتىڭ تۋى استىندا ونەر كورسەتكەن 16 ويىنشىنىڭ جەتەۋى قازاقستاندىق كلۋبتىڭ ورەندەرى ەدى. ولار – ميننەۋلا ءازيزوۆ, سوس ايراپەتيان, فاريد زيگانگيروۆ, ولەگ زاگورودنەۆ, ميحايل نيچيپۋرەنكو, الەكساندر مياسنيكوۆ جانە الەكساندر گونچاروۆ. ءتورت جىلدىقتىڭ باستى دوداسىندا جەڭىس تۇعىرىنا كوتەرىلگەن ساڭلاقتاردان بولەك, مۇرات جەكسەنبەكوۆ, سايان شايمەردەنوۆ, سەرىك قالىمباەۆ, بەرىكقازى سەكسەنباەۆ, ءبىرجان قىدىربەكوۆ, ەرجان قۇمارعاليەۆ جانە تاعى باسقا قانداستارىمىزدىڭ جاسىنداي جارقىلداعانى كۇنى كەشەگىدەي كوز الدىمىزدا. بۇل دۇلدۇلدەردىڭ بارلىعىنىڭ دا ەسىمدەرى وتاندىق سپورت تاريحىندا التىن ارىپتەرمەن جازۋلى.
مىنە, كەزىندە كسرو مەن ەۋروپادا قارسىلاس شاق كەلتىرمەي, ورەلى ونەرىمەن تورتكۇل دۇنيەگە تانىلعان قازاقستاننىڭ كوگالداعى حوككەيىنىڭ قازىرگى جاي-كۇيى وسىنداي. جاسىراتىنى جوق, سپورتتىڭ بۇل ءتۇرى ەلىمىزدە قالت-كۇلت كۇي كەشىپ جاتقانىنا تالاي جىلدىڭ ءجۇزى بولدى. توقسانىنشى جىلداردىڭ ەكىنشى جارتىسىندا رەسپۋبليكالىق فەدەراتسيانىڭ پرەزيدەنتى سايان شايمەردەنوۆ وسى سالانىڭ ەڭسەسىن كوتەرەمىن دەپ كوپ تەر توكتى. ىسكەر باسشىنىڭ العا قويعان ماقساتى ايقىن, جوسپارى كوپ ەدى. الايدا سۇم اجال ابزال ازاماتتى ارامىزدان تىم ەرتە ج ۇلىپ اكەتىپ, سايان سافۋان ۇلىنىڭ باستاعان ىستەرى اياقسىز قالدى. كەيىنگى كەزدەرى بەرىكقازى سەكسەنباەۆ تا كوگالداعى حوككەيدىڭ كوسەگەسىن كوگەرتۋ جولىندا ءبىراز ەڭبەكتەندى. بىراق ودان دا ازىرگە ەش ناتيجە جوق. وكىنىشتى-اق!