كەز كەلگەن مەملەكەتتە ونىڭ كونستيتۋتسياسى قوعامنىڭ يگىلىگىنە قىزمەت ەتۋگە ءتيىس. قوعام يگىلىگى دەگەندە ءبىرىنشى كەزەكتە ۇلتتىق مۇددەگە قىزمەت ەتەتىن زاڭداردىڭ ۇستەمدىك قۇرۋىن ايتامىز. ادىلەتتىلىكتى ساقتايتىن, تۋرالىقتى, شىنايىلىق پەن ءبىلىمدى جاقتايتىن زاڭداردىڭ قابىلدانۋى كەز كەلگەن جالپىعا ورتاق تاجىريبەلەردى قوعام يگىلىگىنە اينالدىرىپ وتىرارى داۋسىز.
اتا زاڭنىڭ ىشىندە جازىلعان زاڭداردىڭ بارلىعى دا بولاشاق ءۇشىن ماڭىزدى. بىراق سونىڭ ىشىندە ەڭ ماڭىزدىسى بۇل جەر ماسەلەسى دەپ ايتار ەدىم. بارلىق كەزدە دە جەر مەن ەلدىڭ يەسى حالىقتىڭ ءوزى بولۋى تەگىن ەمەس. بىراق حالىق ۇلتتىق مۇددەگە يەلىك ەتۋدە كەيىنگى ۋاقىتقا ەل مەن جەردى تابىستاي الاتىن مۇمكىندىكتەردى دە جوعالتىپ الماۋعا ءتيىس. قوعام ءۇشىن باستى مۇمكىندىك – تانىم, اقىل-پاراساتتىڭ ۇستەمدىگى. سوندىقتان رەفەرەندۋم قۇر داڭعازا بولماۋى قاجەت. اركىم ءار جاققا بۇرا تارتپاي, بىلىكتى مامانداردىڭ دا اقىل-كەڭەسىن تىڭداپ بارلىعى دا كوپتىڭ تالقىسىنا سالىنۋى قاجەت. ءبىلىمنىڭ كۇشى مەن ەل بولمىسىنا ءتان بىرلىكتىڭ دە رۋحىن سالماقتاي تۇسەر ءىستىڭ ءبىرى وسى بولادى.
قوعام بولعان سوڭ الۋان پىكىر بار. كونستيتۋتسياعا وزگەرىستەر ەنگىزۋ مەن ونى حالىقتىڭ تالقىسىنا سالۋدىڭ قانشالىقتى قاجەتتىلىگى بار دەگەن سۇراق تا تۋىنداۋى مۇمكىن. مەن مۇنى ۋاقىتتىڭ تالابى دەر ەدىم. بۇل تالاپقا ەل بولىپ ىلەسۋ ءۇشىن ءبىرىنشى كەزەكتە قوعامعا رۋحاني سەرپىلىس قاجەت. مۇنداي باستامالاردىڭ قوعام يگىلىگىنە تيگىزەر پايداسى كوپ. ماڭىزدىسى, بۇل ىسكە حالىق شىنايى اتسالىسۋى كەرەك. زيالىلار دا بۇل ءىستىڭ ناتيجەلى جۇرگىزىلۋىنە مۇرىندىق بولا الادى. ازاماتتىق ۇستانىمىڭدى بىلدىرەتىن ءسات تۋىپ تۇر.
ۇمبەتقان سارسەمبين,
فيلوسوفيا عىلىمدارىنىڭ كانديداتى