مايدان حاتتارى

وق پەن وتتىڭ ورتاسىندا ءجۇرىپ, ەرەن ەرلىك كورسەتىپ, وشپەس داڭققا بولەنگەن باتىرلاردىڭ ەسىمى حال­قى­نىڭ جادىندا ماڭگىلىككە جاتتالدى. جىلدار ۇزاعان سايىن جار­قىن بەينەلەرى مەن بەكزات بول­مىسى ەل جۇرەگىنە جاقىنداي تۇ­سە­رى جانە اقيقات جايت. ال ۋاقىت اعزام الاقانىندا بەدەرلەنگەن ەرەن ەرلىكتەرى وسكەلەڭ ۇرپاق ءۇشىن ۇل­تىن ءسۇيۋ مەن حالقىنا قالت­قىسىز قىزمەن ەتۋدىڭ جارقىن كو­رىنىسى بولىپ ماڭگىلىك جاساي بەرمەك. «مايدان حاتتارى» ارقىلى سىر شەرتىلگەن سۇراپىل جىلدار شىن­دىعى كوركەم ونەر تىلىندە وسى مۇرات جولىندا تاعىلىم تۇيگىزدى.

ونەر مەن ونەگە قاتار ورىلگەن مازمۇندى كەشتە كەڭەس وداعىنىڭ باتىرى مانشۇك مامەتوۆانىڭ حاتى, قارۋ مەن قالامدى قاتار ار­قالاي ءجۇرىپ سوعىسقان مايدان­گەر جازۋشى ءازىلحان نۇرشايى­قوۆ­تىڭ كۇندەلىگىنەن ەستەلىك جانە­ باسقا دا مايدان حاتتارى وقى­لا وتىرىپ, سول نەگىزدە قويىل­عان تەاتر­لاندىرىلعان شا­عىن كو­رىنىستەر كونتسەرتتىك باع­دار­لا­ما­نىڭ كوركەمدىك دەڭگەيى مەن مازمۇندىق ءمانىن ودان ءارى بايىتا ءتۇستى. سونداي-اق كەش بارىسىندا كەڭەس وداعىنىڭ ەكى مارتە باتىرى تالعات بيگەلدينوۆتىڭ تاريحي سۇحباتى كورسەتىلدى.

ماڭگىلىك ەرلىك تاقىرىبىن ار­قاۋ ەتكەن تاعىلىمدى تۋىندى­نىڭ تالعام بيىگىندە ساراپتالۋى­نا تەر توككەن ساحناگەرلەر قا­تارىندا قازاقستاننىڭ حالىق ءارتىسى تىلەكتەس مەيراموۆ, بەل­گى­لى تەاتر جانە كينو اكتەرى, مەم­لە­كەتتىك سىيلىقتىڭ لاۋرەاتى ءادىل احمەتوۆ, قازاقستاننىڭ ەڭبەك سىڭىرگەن قايراتكەرى ايگۇل يمانباەۆا باستاعان ەلوردا تەاتر­لارىنىڭ جەتەكشى اكتەرلەرى بار. باستى ءرولدى سومداعان ارتىستەر تى­لەكتەس مەيراموۆ پەن ءادىل احمە­توۆتىڭ اڭگىمەلەۋى ارقىلى سۇ­راپىل سوعىس جىلدارىنىڭ تا­ريحي پاراقتارى اقتارىلدى. ءار­بىر ساحنالىق قويىلىم ساحنا تو­رىن­دەگى الىپ ەكراندا سالىنعان گرا­فيكالىق رەكونسترۋكتسيالارمەن بەزەندىرىلىپ, سول ارقىلى كورەر­مەندى مايدان الاڭى مەن تىلداعى تىرشىلىككە تەرەڭ بويلاتتى.

بالا رولىندە ءساتتى بەينە جاسا­عان «ا.ي. تەاترىنىڭ» جاس اكتەرى تاڭىربەرگەن يبادۋللاەۆتىڭ تالانتى دا كەلگەن كورەرمەندى تاڭداي قاققىزباي قويمادى. جاس بولسا دا ءرول تابيعاتىن ءجىتى ءتۇسىنىپ, تۇشىمدى بەينە تۋدىرا بىلگەن بالدىرعان ونەرى بولاشاعىنان زور ءۇمىت كۇتتىرەدى.

مەرەكەلىك كونتسەرتتە تەاترلان­دى­رىلعان قويىلىمدارمەن قاتار, سونداي-اق سوعىس جىلدارىنداعى ايگىلى اندەر ر.رىمباەۆا, م.اراپ­باەۆا, ا.جىلتىرگوزوۆ, ت.مۇ­ساباەۆ, ر.جارماعامبەتوۆ, ك.تو­لەن­باەۆا, گ.مىرزابەكوۆا, ە.رىس­قالي, ج.ماياساروۆ, ر.بايدۇكەنوۆا باستاعان ءداستۇرلى جانە ەسترادا ان­شىلەرىنىڭ ورىنداۋىندا كوپشىلىك كو­ڭىلىن قوزعادى. سازىنان گورى ارمانى, مۇڭى مەن وكىنىشى باسىم ان­دەر سوعىستىڭ سۇراپىل جىلدارى­نا ساپار شەكتىرە وتىرىپ, قا­سىرەتتى جىلداردىڭ كورىنىسىن شى­­نايى سەزىندىردى ءھام تىنىشتىق پەن بەي­بىت كۇننىڭ قادىرىنە جەتەر ەشنارسە جوق ەكەندىگىن شىن ۇعىندىرعان­­داي بولدى. اسىرەسە, رامازان ەلەباە­ۆتىڭ «جاس قازاق», قاسىم امان­جو­لوۆتىڭ «داريعا, سول قىز», سەي­دوللا بايتەرەكوۆتىڭ ء«اليا» ان­دە­رىن تىڭداعاندا تەبىرەنبەگەن, تول­قى­ماعان كورەرمەن, ەگىلمەگەن جۇرەك جوق. كەش سوڭىندا باتىرلار رۋحىنا باس ءيىپ, قۇرمەت كورسەتكەن كورەرمەننىڭ سوققان شاپالاعى ۇزاق ۋاقىت تولاستامادى.