قۇلانقارا, بۇلانقارا, جەلمايا سىندى تۇلپارلار تۇياعىنىڭ ءىزى قالعان التايدىڭ بوكتەرىندە ءدۇبىرلى بايگە ءوتتى. وتان قورعاۋشى جانە جەڭىستىڭ 77 جىلدىعىنا وراي ۇيىمداستىرىلعان ءىس-شارادا 100 شاقىرىمدىق الامان, تاي جارىس, جورعا, اۋدارىسپاق, كۇرەس, ارقان تارتۋ سەكىلدى ۇلتتىق سپورت تۇرلەرىنەن اتبەگىلەر, بالۋاندار باق سىناستى.
مەرەكە كۇنى اتشاباردىڭ ماڭىنا اقشاڭقان كيىز ۇيلەر تىگىلىپ, قازان كوتەرىلدى. بۇرق-سارق ساماۋىر قاينادى. «توي دەسە, قۋ باس دومالايدى» دەگەندەي, تاڭمەن تالاسا تۇرعان اۋدان جۇرتى يپپودرومعا اعىلدى. بۇل ۋاقىتتا كورشىلەس التاي اۋدانىنان شىققان شاباندوزدار ەرتىستى جاعالاي شاپقان. مارە سىزىعىنا دەيىن 100 شاقىرىم. ەرتىستەن سوققان تاڭعى سامال سايگ ۇلىكتەردىڭ وكپەسىن اشا ءتۇستى مە, باۋىر جازا كوسىلدى. 100 شاقىرىمعا شىداس بەرمەي, جولدان شىققان قىلقۇيرىقتىلار دا بولدى. شاڭ قاپتىرا توپتاسا شاپقانداردى دا كوردىك. مارەنى ءبىرىنشى قيىپ وتكەنىنە سۋ جاڭا اۆتوكولىك تىگىلگەن. بەسىنشى كەلگەنگە دە جۇلدە قوماقتى. سوندىقتان دا, اۋدان اكىمىنىڭ جۇلدەسىنە شاباندوزدار بارىن سالدى. قاتارلاسا جۇرگەن باپكەرلەرى «قامشى باس» دەسىپ, قيقۋ قوستى. قالاي دەگەنمەن, باعى مەن بابى كەلىسكەن سايگ ۇلىكتەر كومبەگە تاياعان سايىن شابىسقا شابىس قوستى. تۇياق ءدۇبىرى ەستىلە سالا, ءدۇيىم جۇرت شۋلاستى. انە-مىنە دەگەنشە, جيرەن قاسقا قارا ءۇزىپ مارەگە ءبىرىنشى بولىپ ءىلىندى. سامارلىقتار بورىكتەرىن اسپانعا اتتى. كۇنى كەشە پرەزيدەنت جارلىعىمەن قايتا قۇرىلىپ جاتقان سامار اۋدانىنىڭ ابىرويىن اسقاقتاتقان ات – رۋسلان شايىرعازين ەسىمدى ازاماتتىڭ تۇلپارى ەدى. ىرىمشىل حالىق مۇنى جاقسىلىققا بالادى.
بۇدان كەيىن تاي جارىس, جورعا, ۇشقىر بايگە مەرەكەنىڭ كورىگىن قىزدىردى. ات دەسە, الامان دەسە, دەلەبەسى قوزبايتىن قازاق, قازاق پا؟! كوپتەن بەرى كوڭىلدى ءىس-شارادا باسى قوسىلماعان ەل ءماز-ءمايرام, ارقا-جارقا.
بالۋانداردىڭ بەلدەسۋى دە تارتىستى ءوتتى. جاۋىرىنى جەرگە تيمەگەن ازات سماعۇلوۆ تۇيە بالۋان اتانسا, راحات ناريمانوۆ ەكىنشى ورىن الدى. ءۇشىنشى ورىندى سەرىكبول قابديەۆ قاناعات تۇتتى. بايگەدەن سوڭ تاقىمى مىقتى, بىلەگى قارۋلى جىگىتتەر اۋدارىسپاققا شىقتى. قارسىلاسىن ات-ماتىمەن ج ۇلىپ العان بىلەكتىلەردى دە كوردىك.
جارىس سوڭىندا اۋدان اكىمى ءدىلدار قاليقان جۇلدەگەرلەرگە سىي-سياپاتتارىن تابىستاپ, حالىققا جىلى لەبىزىن ءبىلدىردى, شارانى ۇيىمداستىرۋعا ۇلەس قوسقان ازاماتتارعا العىس ايتتى, جارىسقا قاتىسقان اتسۇيەر اعايىنعا ساتتىلىك تىلەدى. ايتا كەتەرلىگى, كۇزگە سالىم كاتونقاراعايدا رەسپۋبليكالىق ءداستۇرلى تاي جارىسى وتەدى.
شىعىس قازاقستان وبلىسى,
كاتونقاراعاي اۋدانى