نۇر-سۇلتان قالاسىنىڭ ءبىلىم باسقارماسى باسشىسىنىڭ ورىنباسارى ريمما يمانعازينوۆا كامەلەتكە تولماعاندار اراسىندا سۋيتسيد ارەكەتتەرىنىڭ جيىلەپ كەتكەنىن ايتتى, دەپ حابارلايدى Egemen.kz.
«كامەلەتكە تولماعاندار اراسىندا وزىنە قول سالۋ ارەكەتتەرىنىڭ باستى سەبەپتەرى رەتىندە وتباسىنداعى جانجال, جاسوسپىرىمدەر مىنەزىنىڭ پسيحولوگيالىق ەرەكشەلىكتەرى, سونداي-اق ولاردىڭ باسقا دا ادامدارمەن كيكىلجىڭى اسەر ەتىپ وتىر. سوندىقتان وسى پروبلەمانى شەشۋ ءۇشىن كاسىبي پسيحولوگتاردىڭ جۇمىسى ماڭىزدى. قازىرگى كەزدە قالا مەكتەپتەرىندە 209 پسيحولوگ قىزمەت ەتىپ ءجۇر», دەدى ريمما يمانعازينوۆا قالالىق ءماسليحات وتىرىسىندا.
ول ءبىر پسيحولوگقا 850 وقۋشىدان كەلەتىنىن ايتتى. باسقارما وكىلىنىڭ ايتۋىنشا, مەسسەندجەرلەردە ءسۋيتسيدتى ناسيحاتتايتىن كانالداردى بۇعاتتاۋ مەن قاۋىپتى سايتتاردى انىقتاۋ جۇمىستارىن كۇشەيتۋ قاجەت.
ايتا كەتسەك, 2022 جىلدىڭ 4 ايىندا ەلوردادا كامەلەتكە تولماعاندار اراسىندا سۋيتسيد ارەكەتى بويىنشا 41 فاكتى انىقتالدى.