قارجى ءمينيسترى ەرۇلان جاماۋباەۆتىڭ ايتۋىنشا, بيىلعى 4 ايدا مەملەكەتتىك بيۋدجەتكە 5 ترلن 93 ملرد تەڭگە كىرىس ءتۇستى جانە جوسپار 108,6%-كە ورىندالدى, دەپ حابارلايدى Egemen.kz.
«بيىلعى 4 ايدىڭ قورىتىندىسى بويىنشا مەملەكەتتىك بيۋدجەتكە 5 ترلن 93 ملرد تەڭگە كىرىس ءتۇستى نەمەسە جوسپار 108,6%-كە ورىندالدى. رەسپۋبليكالىق بيۋدجەتكە 3,4 ترلن تەڭگەگە جۋىق قاراجات ءتۇستى نەمەسە جوسپار 101,1%-كە ورىندالدى», دەدى جاماۋباەۆ ۇكىمەت وتىرىسىندا.
كىرىستەر بويىنشا جوسپار 36 ملرد تەڭگەگە, ونىڭ ىشىندە سالىقتار - 24 ملرد تەڭگەگە, سالىقتىق ەمەس تۇسىمدەر – 12 ملرد تەڭگەگە اسىرا ورىندالعان.
سالىقتار بويىنشا اسىرا ورىنداۋدىڭ نەگىزگى سومالارى كورپوراتيۆتىك تابىس سالىعىنا, شيكى مۇنايعا ەكسپورتتىق كەدەندىك باجعا, ويىن بيزنەسىنە سالىناتىن سالىققا جانە پايدالى قازبالاردى وندىرۋگە سالىناتىن سالىققا تيەسىلى بولدى.
«كورپوراتيۆتىك تابىس سالىعى بويىنشا, 2021 جىلعى قاڭتار-ءساۋىر ايلارىمەن سالىستىرعاندا بيىلعى 4 ايدا 686 ءىرى سالىق تولەۋشى بويىنشا اۆانستىق تولەمدەر سوماسى 81,3%-كە نەمەسە 282 ملرد تەڭگەگە ۇلعايدى. ءىرى تاۋ-مەتاللۋرگيا كومپانيالارىنا قاتىستى سالىقتىق اكىمشىلەندىرۋ بويىنشا جۇرگىزىلىپ جاتقان ءىس-شارالار بار. جالپى العاندا, بيۋدجەتكە قوسىمشا 303 ملرد تەڭگە, ونىڭ ىشىندە سالىقتىق اكىمشىلەندىرۋ شارالارى ەسەبىنەن 29 ملرد تەڭگە ءتۇستى», دەپ ءتۇسىندىردى مينيستر.
شيكى مۇنايعا ەكسپورتتىق كەدەندىك باج بويىنشا جوسپاردىڭ اسىرا ورىندالۋى قاڭتار-ساۋىردە شيكى مۇنايعا مولشەرلەمەنىڭ 42%-كە ۇلعايۋىنا جانە اقش دوللارىنا شاققاندا تەڭگە باعامىنىڭ وزگەرۋىنە بايلانىستى بولدى. ويىن بيزنەسىنە سالىناتىن سالىق بويىنشا جوسپار سالىقتىق تەكسەرۋ اكتىلەرى بويىنشا بەرەشەكتى وتەۋ ەسەبىنەن اسىرا ورىندالدى.
«دەگەنمەن, ىشكى تۇتىنۋ تاۋارلارىنا سالىناتىن قوسىلعان قۇن سالىعى بويىنشا جوسپار ورىندالمادى. سونداي-اق, جەرگىلىكتى بيۋدجەتتەردىڭ كىرىستەرى 127,1%-كە اتقارىلىپ, 1 ترلن 719 ملرد تەڭگەنى قۇراعان. كىرىستەر بويىنشا جوسپارلار ماڭعىستاۋ وبلىسىن قوسپاعاندا, بارلىق وڭىرلەردە اسىرا ورىندالعان», دەدى قارجى ءمينيسترى.
ايانا توعانبەك