يۋليا پۋتينتسەۆا ريمدە الەمنىڭ بۇرىنعى ءبىرىنشى راكەتكاسىن ۇتتى

جارىستى ىرىكتەۋ سايىستارىنان باستاعان يۋ.پۋتينتسەۆا ەكىنشى اينالىمدا الەمنىڭ بۇرىنعى ءبىرىنشى, قازىرگى 10-راكەتكاسى, «ۇلكەن دۋلىعا» ءتۋرنيرىنىڭ ەكى مارتە جەڭىمپازى, يسپانيالىق گاربينە مۋگۋرۋسامەن شەبەرلىك بايقاستى.

بۇعان دەيىن قارسىلاستار ءوزارا ەكى رەت كەزدەسىپ, يسپانيالىق تەننيسشى باسىم تۇسكەن بولاتىن. بۇل جولى ءبىرىنشى پارتيادا گ.مۋگۋرۋسا باسىمدىق تانىتتى – 6:3.

ەكىنشى سەتتە يسپانيالىق سپورتشى ماتچقا دوپ بەرگەندە, يۋ.پۋتينتسەۆا قايرات تانىتا الدى – 5:5. سوسىن تاي-برەيكتە تارازى باسىن اۋدارا ءبىلدى – 7:6 (7:4). ءۇشىنشى, شەشۋشى پارتيادا قازاقستاندىق تەننيسشى قارقىنىن ءتىپتى ۇدەتتى – 6:1.

ەكى ساعات 17 مينۋتقا سوزىلعان ماتچ بارىسىندا يۋ.پۋتينتسەۆا 10 برەيك-پوينتتىڭ تەڭ جارتىسىن پايدالاندى. قارسىلاسى 3 ەيس, 3 برەيكپەن (6 برەيك-پوينت) كوزگە ءتۇستى.

يۋ.پۋتينتسەۆا جۇلدە قورى 2,5 ملن ەۋرودان اساتىن جارىستىڭ شيرەك فينالىنا شىعۋ ءۇشىن الەمنىڭ 7-راكەتكاسى, تۋنيس وكىلى ونس جابەرمەن تالاسادى.

وتكەن اپتادا ءدال وسىنداي مادريد دوداسىنىڭ جەڭىمپازى اتانعان و.جابەر ريمدە ەكىنشى اينالىمدا اۋستراليالىق ايلا ءتومليانوۆيچتى 7:5, 6:2 ەسەبىمەن ۇتتى.

ەلەنا رىباكينا ءۇشىنشى اينالىمدا الەمنىڭ 29-راكەتكاسى شۆەيتساريالىق حيل بەلەن تايحمانمەن كورتقا شىعادى. مادريد جارىسىندا ە.رىباكينا وسى تەننيسشىدەن جەڭىلىپ قالعان بولاتىن.