يتاليانىڭ استاناسى – ريمدە «ۇلكەن دۋلىعا» ساناتىنداعى رولان گارروس جارىسىنا سوڭعى دايىندىق رەتىندە ۇيىمداستىرىلاتىن تەننيسشىلەردىڭ ءىرى ءتۋرنيرى وتۋدە. ەرلەر اراسىنداعى جارىستىڭ جۇلدە قورى 5 415 410 ەۋرونى قۇراسا, ايەلدەر 2 527 250 ەۋرونى بولىسكە سالىپ جاتىر.
اتالعان دوداعا قاتىسۋ ءۇشىن وسى سپورت ءتۇرىنىڭ بارلىق سەركەلەرى اپەننين تۇبەگىن بەتكە العان ەكەن. سولاردىڭ اراسىندا نوۆاك دجوكوۆيچ, الەكساندر زۆەرەۆ, رافاەل نادال, ستەفانوس تسيتسيپاس, كاسپەر رۋد, اندرەي رۋبلەۆ, مارين چيليچ جانە تاعى باسقا كوپتەگەن ساڭلاقتار بار. وكىنىشكە قاراي, قازاقستاننىڭ ءبىرىنشى راكەتكاسى, اتر تىزىمىندە 40-ورىندا تۇرعان الەكساندر بۋبليك الەمدىك رەيتينگتە وزىنەن 12 ساتىعا تومەن جايعاسقان امەريكالىق ماركوس گيروننان ايلاسىن اسىرا المادى – 6:3, 4:6, 3:6. ەسەسىنە ايەلدەر اراسىنداعى جارىستى جەرلەستەرىمىز ءساتتى باستادى. العاشىندا يۋليا پۋتينتسەۆا سلوۆەنيالىق كايا يۋۆاندى سان سوقتىردى – 7:5, 4:6, 7:5. كوپ كەشىكپەي ەلەنا رىباكينا رەسەيلىك ەلينا اۆانەسياننان باسىم ءتۇستى – 6:4, 7:6.
ەكىنشى كەزەڭدە پۋتينتسەۆا يسپانيالىق گاربينە مۋگۋرۋسامەن كۇش سىناسسا, رىباكينا اقش وكىلى لورەن دەۆيسپەن شەبەرلىك بايقاسادى.