پاۆلودار وبلىسىنداعى ءۇش اۋداندا جايىلىمدىق جەر تاپشى

اتاپ ايتقاندا, پاۆلودار وبلىسىنداعى تەرەڭكول, شارباقتى جانە پاۆلودار اۋداندارىنداعى 36 اۋىلدا مال جاياتىن جەر جوق. باسقا اۋدانداردا دا جايىلىمنىڭ ازدىعى ايتارلىقتاي بايقالادى. ماسەلەن, ۋسپەن اۋدانىنىڭ تۇرعىنى مۇحتار بايمامىروۆ قوراسىنداعى ازدى-كوپتى قوي مەن جىلقىسىنىڭ سانىن ارتتىرۋدى قالاعانىمەن, قولى بايلاۋلى.

«اۋدانداعى بوس اۋماقتىڭ بارلىعىنا ەگىن ەگىلەدى. ارينە, استىق وسىرگەن دۇرىس. وعان ەش قارسىلىق جوق. بىراق بۇل مال شارۋاشىلىعىن شەتكە ىسىرىپ قويۋ قاجەت دەگەندى بىلدىرمەسە كەرەك. ءتورت ت ۇلىك ۇستاپ وتىرعان ءبىز سياقتى قاراپايىم تۇرعىندارعا دا جاعداي جاسالسا ەكەن دەيمىز. قازىر اۋدان ورتالىعىنىڭ ماڭىندا جايىلىمدىق جەر جوقتىڭ قاسى. كۇندە تاڭەرتەڭ قوي مەن جىلقىنىڭ جولدىڭ ار جاعىنا شىعارىپ, كەشقۇرىم قايتا قوراعا اكەلىپ, قاماۋدان باسقا امال بولماي تۇر. شارۋالار ەگىن ەككەن سوڭ جاعداي ءتىپتى قيىندايدى. جىل سايىن وسى ماسەلەنى كوتەرىپ, جايىلىمدىق جەر سۇراعانىمىزبەن, ماسەلە شەشىلمەي كەلەدى», دەيدى مۇحتار بايمامىروۆ.

پاۆلودار وبلىستىق جەر قاتىناستارى باسقارماسىنىڭ باسشىسى رۋسلان داۋىتباەۆتىڭ ايتۋىنشا, بيىل بۇل باعىتتا ىلگەرى قادامدار جاسالادى. اتاپ ايتساق, قاراپايىم حالىقتىڭ قاجەتتىلىگى ءۇشىن 380 مىڭ گەكتار جەر پايدالانۋعا بەرىلەدى.

«جايىلىمدىق جەرلەردىڭ تاپشىلىعى وتكىر تۇر. مىسالى, شارباقتى اۋدانىندا اۋماقتىڭ باسىم بولىگىن ورمان, ال پاۆلودار مەن تەرەڭكول اۋداندارى ەرتىس وزەنىنىڭ جاعاسىندا ورنالاسقاندىقتان سۋارمالى القاپ الىپ جاتىر. بۇل ماسەلەنى شەشۋ ءۇشىن جالپى اۋماعى شامامەن 100 مىڭ گەكتار بولاتىن 200-گە جۋىق جەر ۋچاسكەسى مەملەكەتكە قايتارىلادى. سونداي-اق جايىلىمدار كولەمى جەر قورىنىڭ ەسەبىنەن ارتادى. وسىلايشا, 380 مىڭ گەكتار اۋماق ەلەكتروندى ساۋدا ارقىلى نەمەسە جەر كوميسسياسى شەشىمىمەن تۇرعىندار مەن شارۋالارعا ۇسىنىلادى», دەيدى رۋسلان داۋىتباەۆ.

جىل باسىنان بەرى بارلىعى 20 مىڭ گەكتار جايىلىم ۇلەستىرىلدى. بارلىعى پاۆلودار وبلىسىندا 8,3 ملن گەكتار مال جاياتىن جەر بار. ونىڭ 4,7 ملن گەكتار اۋىل شارۋاشىلىعى تاۋارلارىن وندىرۋشىلەردىڭ يگەرىلۋىنە بەرىلگەن.