زەينەتاقى جيناقتارىن ەڭ كوپ پايدالانعان وڭىرلەر اتالدى

«ورىندالعان وتىنىشتەردىڭ ەڭ كوبى الماتى قالاسىنىڭ (17,74%), نۇر-سۇلتان قالاسىنىڭ (13,52%), ماڭعىستاۋ وبلىسىنىڭ (10,40%) تۇرعىندارى تاراپىنان جولدانعان. 2022 جىلدىڭ ءساۋىر ايىندا (01.04.22-30.04.22) جالپى سوماسى 7,6 ملرد تەڭگەگە بارلىعى 3 276 ءوتىنىش ورىندالدى», دەپ حابارلادى بجزق ءباسپاسوز قىزمەتى.

ايتا كەتەيىك, ۋاكىلەتتى وپەراتورلاردان سالىمشىلاردىڭ جەكە زەينەتاقى شوتتارىنا (جزش) ءوتىنىش بەرۋشىنىڭ ءوتىنىشى جانە وزگە دە سەبەپتەر بويىنشا 422,0 ملرد تەڭگەدەن اسا قاراجات قايتارىلدى, سەبەبى, قازاقستاندىقتار بىرجولعى زەينەتاقى تولەمدەرىن بەلگىلەنگەن مەرزىمدە پايدالانباعان.

«سونىمەن قاتار, بجزق ەمدەلۋگە بەرىلگەن 295,9 ملرد تەڭگەگە 383 191 ءوتىنىشتى ورىندادى. بۇل رەتتە الۋعا بولاتىن ورتاشا سوما شامامەن 0,8 ملن تەڭگە. سونىمەن قاتار, سالىمشىلاردىڭ بجزق-داعى جزش-نا ۋاكىلەتتى وپەراتوردان 28,1 ملرد تەڭگە قايتارىلدى, بۇل قاراجات سالىمشىنىڭ ءوتىنىشى نەمەسە وزگە دە سەبەپتەر بويىنشا بەلگىلەنگەن مەرزىمدە پايدالانىلماعان. 2022 جىلدىڭ ءساۋىر ايىندا (01.04.22-30.04.22) جالپى سوماسى 2,5 ملرد تەڭگەگە 2 195 ءوتىنىش ورىندالدى», دەپ حابارلادى بجزق-نىڭ ءباسپاسوز قىزمەتى.

2022 جىلدىڭ 1 مامىرىنداعى جاعداي بويىنشا, ينۆەستيتسيالىق پورتفەلدى باسقارۋشىلارعا (يپب) 8,7 ملرد تەڭگە اۋدارىلىپ, بجزق 5 869 ءوتىنىشتى ورىندادى. اۋدارىمنىڭ ورتاشا سوماسى 1,5 ملن تەڭگە. 

بۇل رەتتە 2022 جىلعى ساۋىردە (01.04.22-30.04.22) يپب-عا 0,2 ملن تەڭگە اۋدارۋ جونىندە بارلىعى 2 ءوتىنىش بەرىلدى.

قازىرگى ۋاقىتتا بجزق زەينەتاقى اكتيۆتەرىن سەنىمگەرلىكپەن باسقارۋعا قاتىستى ءتورت يپب-مەن شارت جاساستى.

ايتا كەتەيىك, 8,7 ملرد تەڭگەنىڭ 45,11% نەمەسە 3,9 ملرد تەڭگەسى «Jusan Invest» اق, 28,46% نەمەسە 2,5 ملرد تەڭگەسى «Halyk Global Markets» اق, 16,16% نەمەسە 1,4 ملرد تەڭگەسى «BCC Invest» اق, 10,27% نەمەسە 0,9 ملرد تەڭگەسى «سەنتراس سەكيۋريتيز» اق اۋدارىلدى.

ەستەرىڭىزگە سالا كەتسەك, بجزق-دان زەينەتاقى اكتيۆتەرىن العاننان كەيىن يپب ولاردى قر ۇلتتىق بانكى باسقارماسىنىڭ 2014 جىلدىڭ 3 اقپانىنداعى №10 قاۋلىسىمەن بەكىتىلگەن ينۆەستيتسيالىق پورتفەلدى باسقارۋ جونىندەگى قىزمەتتى جۇزەگە اسىرۋ قاعيدالارىندا كورسەتىلگەن جانە يپب ينۆەستيتسيالىق دەكلاراتسياسىندا كوزدەلگەن رۇقسات ەتىلگەن قارجى قۇرالدارىنا ينۆەستيتسيالايدى.

«زەينەتاقىمەن قامسىزداندىرۋ تۋرالى زاڭعا سايكەس, يپب ينۆەستيتسيالىق باسقارۋدى جۇزەگە اسىرعانى ءۇشىن كوميسسيالىق سىياقى الۋعا قۇقىلى. يپب سىياقىسىنىڭ شەكتى شاماسى الىنعان ينۆەستيتسيالىق تابىستىڭ 7,5% اسپاۋى ءتيىس. كوميسسيالىق سىياقىنىڭ ناقتى شاماسىن جىل سايىن يپب-نىڭ باسقارۋشى ورگانى بەكىتەدى جانە ول جىلىنا ءبىر رەت قانا وزگەرۋى مۇمكىن», دەپ حابارلادى بجزق-نىڭ ءباسپاسوز قىزمەتى.