قازاقستان مەن تۇركيا جۇك تاسىمالدارى تۋرالى كەلىسىمىنە قول قويىلدى

جيىندا مينيستر ترانسپورت, ونەركاسىپ, قۇرىلىس جانە اسكەري تەحنيكا سالالارىندا جۇزەگە اسىرىلعان جانە الداعى ۋاقىتتا ىسكە قوسىلاتىن قازاق-تۇرىك بىرلەسكەن جوبالارى تۋرالى ماڭىزدى اقپاراتتارمەن تانىستىردى.

قايىربەك وسكەنباەۆ ترانسكاسپي حالىقارالىق كولىك باعدارىن دامىتۋعا ەرەكشە نازار اۋداردى. ول اعىمداعى جىلدىڭ ءساۋىر ايىندا تحكب حالىقارالىق قاۋىمداستىعى قۇرىلعانىن اتاپ ءوتتى. اتالعان ۇيىم قازاقستان, ءازىربايجان, گرۋزيا, تۇركيا, ۋكراينا, رۋمىنيا, پولشا جانە قىتايدىڭ ماگيسترالدىق ينفراقۇرىلىم يەلەرى مەن تاسىمالداۋشىلارىن بىرىكتىرەدى.

«جوباعا قاتىسۋشى مەملەكەتتەردىڭ ترانسپورتتىق ۆەدومستۆالارى اراسىنداعى كەڭەيتىلگەن وتىرىس ءوتتى. باسقوسۋ ناتيجەسىندە ترانسكاسپي حالىقارالىق كولىك باعدارىن دامىتۋ بويىنشا دەكلاراتسياعا قول قويىلدى. قۇجات بىرلەسكەن لوگيستيكالىق كومپانيالار قۇرۋ, بىرىڭعاي لوگيستيكالىق تىزبە قالىپتاستىرۋ مەن تاريف بەكىتۋ, اۆتوكولىك قۇرالدارىمەن تاسىمالداۋشىلاردى تارتۋ جانە ت.ب. بار. سونىمەن قاتار دەكلاراتسيا شەڭبەرىندە «اقتاۋ تەڭىز پورتى» ارنايى ەكونوميكالىق ايماعى بازاسىندا ساۋدا فلوتىن تولىقتىرۋ مەن كونتەينەر حابىن قۇرۋ دا جوسپارلانىپ وتىر. ينۆەستور رەتىندە PSA Group, Maersk, MSC سىندى الەمدىك كونتەينەر وپەراتورلارىن تارتۋ كوزدەلۋدە»,  دەدى مينيستر. 

اتالعان جوبانىڭ دامۋىنا باكۋ-تبيليسي-كارس تەمىرجول جەلىسىنىڭ تۇراقتى تۇردە پايدالانۋعا بەرىلۋى دە قوسىمشا سەرپىن بەرمەك. بۇل جەلى تۇركياعا باعىتتالعان وڭتايلى مارشرۋت قۇرۋعا جانە ەۋروپالىق تەمىرجول جەلىسىنە شىعۋعا جول اشادى.

«باكۋ-تبيليسي-كارس تەمىرجول جەلىسى ارقىلى قولدانىستاعى جانە الداعى ۋاقىتتا جۇزەگە اساتىن بىرلەسكەن ينفراقۇرىلىمدىق جوبالاردى قىتايدان باستاپ كاسپي تەڭىزى ارقىلى تۇركياعا جانە وڭتۇستىك ەۋروپا مەملەكەتتەرىنە لوگيستيكالىق تىزبەك قۇرۋعا مۇمكىندىك بەرەدى», دەپ اتاپ ءوتتى قر يدم باسشىسى.

سونىمەن قاتار قايىربەك وسكەنباەۆ ەكى ەل اراسىنداعى تۇراقتى اۋە رەيستەرىنىڭ ارتقانىن دا باياندادى.

«بۇگىندە قازاقستاننىڭ اقتاۋ, اقتوبە, الماتى, اتىراۋ, نۇر-سۇلتان, تۇركىستان جانە شىمكەنت قالالارىنان تۇركياعا اپتاسىنا 37 جولاۋشىلار رەيسى ورىندالادى. قازاقستاننان اپتاسىنا انتاليا جانە ستامبۇلعا 24 اۋە تاسىمالى جۇزەگە اسىرىلادى. ال بيىلعى جىلدىڭ 13 مامىرىنان باستاپ انتاليا جانە بودرۋمعا تاسىمال قازاقستاننىڭ 10 قالاسىنان (ونىڭ ىشىندە قاراعاندى, قوستاناي, ورال جانە وسكەمەن) جۇزەگە اسىرىلىپ, ۇشۋ سانى اپتاسىنا 63 رەيسكە ارتپاق. ناتيجەسىندە, مەملەكەتتەر اراسىنداعى اپتالىق رەيسەردىڭ جالپى سانى 124-كە دەيىن وسپەك», دەدى مينيستر.

سونداي-اق ول قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيترلىگىنىڭ ۇسىنىسىمەن ەكى ەلدىڭ اۆياتسيالىق بيلىگى اراسىندا ۇشۋ گەوگرافياسىن كەڭەيتۋ جانە رەيستەردىڭ سانىن ارمەن قاراي كوبەيتۋ ماسەلەلەرى جايىندا كەلىسسوزدەر وتكىزۋ ۇسىنىلعانىن ايتتى. ءوزارا ىنتىماقتاستىقتى ارتتىرۋ بويىنشا كەلىسسوزدەردى وتكىزۋگە قول جەتكىزىلدى. باسقوسۋ بيىلعى جىلدىڭ شىلدە ايىندا ستامبۇل قالاسىندا وتەدى.

اسكەري-تەحنيكالىق ىنتىماقتاستىق «Aselsan» كومپانياسىمەن ارىپتەستىك اياسىندا ءساتتى دامۋدا. «قازاقستان اسەلسان ينجينيرينگ» جشس ەلەكتروندى-وپتيكالىق قۇرىلعىلار مەن راديوستانتسيالاردىڭ كەڭ سپەكترىن وندىرەتىن قازاق-تۇرىك بىرلەسكەن كاسىپورنى. كاسىپورىن قۇرىلعاننان بەرى تاپسىرىس بەرۋشىلەرگە قۇنى 160 ملن. دوللاردان اساتىن 16 مىڭنان استام ءونىم جەتكىزگەن.

«قازاقستان تاراپى رەسپۋبليكانىڭ قارۋلى كۇشتەرىن زاماناۋي تەحنيكامەن قامتاماسىز ەتۋگە نيەتتى. وسىعان وراي تۇركيامەن اراداعى اسكەري-تەحنيكالىق ىنتىماقتاستىقتى ودان ارمەن نىعايتۋ كوزدەلىپ وتىر», دەدى مينيسترلىك باسشىسى.

قر پرەزيدەنتىنىڭ تۇركياعا جاساعان مەملەكەتتىك ساپارىنىڭ قورىتىندىسى بويىنشا 11 ەكىجاقتى قۇجاتقا قول قويىلدى. يدم تاراپىنان مينيستر ق. وسكەنباەۆ حالىقارالىق قۇرامداستىرىلعان جۇك تاسىمالدارى تۋرالى ۇكىمەتارالىق كەلىسىمگە قول قويدى.