ەلەنا رىباكينا ريم جارىسىنىڭ ەكىنشى اينالىمىنا ءوتتى

قازاقستاندىق تەننيسشى العاشقى اينالىمدا ىرىكتەۋ سايىستارى جەڭىمپازدارىنىڭ ءبىرى, دۇنيەجۇزىلىك رەيتينگتە 146-ورىندا تۇرعان 19 جاستاعى رەسەيلىك ەلينا اۆانەسيانمەن شەبەرلىك بايقاستى.

ءبىرىنشى پارتيادا ەسەپ 4:4 بولعان مەزەتتە ە. رىباكينا ءتورتىنشى برەيككە قول جەتكىزىپ, سوسىن ءوز گەيمىن دە الدى – 6:4.

ەكىنشى سەتتە ەسەپ 5:3 بولعان كەزدە دوپ بەرگەن ە. اۆانەسيان ءوز مۇمكىندىگىن پايدالانا المادى. بۇدان كەيىن قاتارىنان ءۇش گەيمدى العان ە. رىباكينا ماتچقا دوپ بەرگەن ءساتتى ءمۇلت جىبەردى – 6:6. دەگەنمەن, تاي-برەيكتە ەلەنا قارسىلاسىنا بىردە-ءبىر ۇپاي بەرگەن جوق – 7:6 (7:0).

ءبىر ساعات 50 مينۋتقا سوزىلعان ماتچ بارىسىندا قازاقستاندىق سپورتشى 2 ەيسپەن بىرگە 10 برەيك-پوينتتىڭ التاۋىن پايدالاندى. قارسىلاسى 5 برەيكپەن (11 برەيك-پوينت) ەرەكشەلەندى.

ە. رىباكينا جۇلدە قورى 2,5 ملن ەۋرودان اساتىن جارىستىڭ ءۇشىنشى اينالىمىنا شىعۋ ءۇشىن رەيتينگتە 102-ساتىداعى امەريكالىق لورەن دەۆيسپەن تالاسادى.

نەگىزگى تۋرنيرگە ىرىكتەۋ سايىستارىنان قوسىلعان ل. دەۆيس العاشقى اينالىمدا الەمنىڭ 13-راكەتكاسى, 2017 جىلعى رولان گارروس دوداسىنىڭ جەڭىمپازى, لاتۆيالىق ەلەنا وستاپەنكونى 6:2, 6:3 ەسەبىمەن جولدان تايدىردى.

ايانا توعانبەك