قوستاناي وبلىسىنىڭ قاراسۋ اۋدانى جاعىنان توسىن كەلگەن قارعىن سۋ الماتى-ەكاتەرينبۋرگ باعىتىنداعى تاسجولدىڭ ءبىر بولىگىن شايىپ كەتىپ, كولىكتەر ارنايى تەحنيكالاردىڭ كومەگىمەن اينالما جول ارقىلى تراسساعا شىعۋعا ءماجبۇر بولدى. اپات بولعان ايماققا جەتكەن وبلىس اكىمى سامات ەسكەندىروۆ جاعدايدى شۇعىل تۇزەتۋ شارالارىن قابىلدادى.
ناتيجەسىندە 20-عا جۋىق كاماز كولىكتەرى, ەكسكاۆاتورلار جۇمىلدىرىلىپ, ءىڭىر قاراڭعىلىعىندا جولدى قالپىنا كەلتىرۋ جۇمىستارى اياقتالدى. توتەنشە جاعدايلار مينيسترلىگىنەن قوسىمشا كۇشتەر تارتىلىپ, الماتى قالاسىنىڭ №28237 اسكەري بولىمىنەن كەلگەن قىرىق سارباز دا بەلسەندىلىك كورسەتتى.
ع.مۇسىرەپوۆ اۋداندىق ءتوتەنشە جاعدايلار ءبولىمىنىڭ جەتەكشىسى ءامىر بەكشەنتاەۆتىڭ ايتۋىنشا, شارىق سۋ قويماسىنىڭ جايى سىن كوتەرمەيدى. وسىدان ون جىل بۇرىن جەڭىل-جەلپى جوندەۋ كورگەنى بولماسا, گيدروتوراپتاردىڭ 70 پايىزىنىڭ توزىعى جەتكەن. 8 ناۋانىڭ 3-ءۋى عانا قار سۋىن وتكىزۋگە قاۋقارلى. بوگەت سىر بەرسە, رۋزاەۆكا, كوكالاجار, مادەنيەت, چەرنوباەۆكا ەلدى مەكەندەرىن سۋ الىپ كەتۋ قاۋپى بار.
سامات ساپاربەك ۇلى «قازاۆتودور» مەكەمەسىمەن بىرلەسە وتىرىپ, جازدا كۇردەلى جوندەۋ جۇمىستارى جۇرگىزىلەتىنىن قاداپ ايتتى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.