بارىنەن دە ەڭ سۇلۋ...

قىزدار ۋنيۆەرسيتەتىنىڭ ارۋى انىقتالدى

بايىرعى قازاق مەملەكەتتىك قىزدار پەداگوگيكالىق ۋنيۆەرسيتەتى ءداستۇرلى «ۋنيۆەرسيتەت ارۋى» بايقاۋىن ۇيىمداستىرىپ, ەڭ كوركەم قىزدارىن انىقتادى. قازاق قىزدارىنىڭ اياۋلى دا سۇلۋ بولمىسىن, بۇگىنگى رۋحاني ۇلت ءداستۇرى مەن مادەنيەتىن بويىنا جيناقتاعان, اقىلىنا كوركى ساي بويجەتكەندەردى ناسيحاتتاۋ ماقساتىندا وتكەن بايقاۋعا ءار فاكۋلتەتتەن ءبىر ۇمىتكەردەن, سان ونەردى تال بويىنا توعىستىرا بىلگەن, اقىلىنا كوركى ساي, بۇرىمدى قىزدار قاتىستى. الدىمەن ارۋلار جينالعان قاۋىمعا ارنايى دايىندالعان بەينەبايان ارقىلى وزدەرىن تا­نىستىرىپ, ارمان, ماقساتتارىمەن بولىسسە, ەكىنشى كەزەڭدە ءوز ونەرلەرىن پاش ەتتى. «ونەرلىنىڭ ءورىسى كەڭ» اتتى ونەر بايقاۋىندا ءبىرى انشىلىگىن, بيشىلىگىن كورسەتسە, ەندى ءبىرى بۇگىنگى قوعامداعى وزەكتى تاقىرىپتاردىڭ ءبىرى بولىپ تابىلاتىن جەتىمدەر ماسەلەسىن كوتەرىپ, «جەتىم بالانىڭ مۇڭى», «انا مەن بالانىڭ سىرلاسۋى» دەگەن تاقىرىپتاردا مونولوگ وقىپ, اكتەرلىك شەبەرلىكتەرىن العا تارتتى. ءۇشىنشى «اقىلى – كوركىنە ساي, تاعامى – داستۇرىنە ساي» كەزەڭىندە بويجەتكەندەردىڭ ءبىلىم دەڭگەيى مەن جاساعان تاعامى ارقىلى اسپازدىق شەبەرلىكتەرى سىنالدى. بايقاۋدا قىزدار بۇگىندە ۇمىت بولعان «ءاسىپ» (قوي ىشەگىنەن جاسالعان) جانە «قارما» (بالىقتان جاسالعان) دەپ اتالاتىن اس ءتۇرىن ۇسىندى. ۇلتىمىزدىڭ تانىمال ونەر ادامدارىنان قۇرالعان قازىلار القاسىنىڭ شەشىمىمەن ونەر جانە مادەنيەت فاكۋلتەتىنىڭ 1-كۋرس ستۋدەنتى ءسابينا قويشانوۆا ۋنيۆەرسيتەت ارۋى اتاندى. «ۋني­ۆەرسيتەت ارۋى» ءتاجىن 2013 جىلدىڭ ارۋى اتانعان ايگەرىم سوپىبەكوۆا سالتاناتتى تۇردە تابىستاپ, باسىنا كيگىزدى. ايناش ەسالي, «ەگەمەن قازاقستان». الماتى. –––––––– سۋرەتتە: «ۋنيۆەرسيتەت ارۋى-2014» ءسابينا قويشانوۆا.