قر مەملەكەتتىك حاتشىسى ەرلان قارين ەكىنشى دۇنيەجۇزىلىك سوعىس قاھارمانى مانشۇك مامەتوۆانىڭ ەسكەرتكىشىنە گۇل قويۋ راسىمىنە قاتىستى, دەپ حابارلايدى Egemen.kz.
جەڭىس كۇنىنە وراي ەلورداداعى جەڭىس داڭعىلىنىڭ بويىنداعى «اقجايىق» ساياباعىندا سالتاناتتى شارا ءوتتى. جينالعان قاۋىم قارعالداقتاي قىسقا عانا عۇمىرىندا كەيىنگى ۇرپاققا ۇران بولاتىنداي ەرلىك جاساي بىلگەن مانشۇك مامەتوۆانىڭ ەسكەرتكىشىنە گۇل قويىپ, سوعىس قۇرباندارىن ءبىر مينۋت ۇنسىزدىكپەن ەسكە الدى.
ەكىنشى دۇنيەجۇزىلىك سوعىس قازاق تاريحىنا مانشۇك مامەتوۆا, ءاليا مولداعۇلوۆا, حيۋاز دوسپانوۆا سياقتى اياۋلى ەسىمدەردى قالدىردى. حيۋاز دوسپانوۆا قارسى جاققا اۋەدەن قىرعيداي تيسە, ءاليا مولداعۇلوۆا مەرگەندىگىمەن جاۋدىڭ زارەسىن الدى. ال مانشۇك مامەتوۆا پۋلەمەتشى رەتىندە تاريحتا قالدى.
رەسمي تاريح مانشۇك مامەتوۆانىڭ 21 جاسىندا نەۆەل قالاسى ءۇشىن شايقاستا ەرلىكپەن قازا تاپقانىن ايتادى. ۇرىستاعى ماڭىزدى نۇكتەنى جاۋ قولىنا بەرمەۋ ءۇشىن باسىنا سنارياد جارىقشاعى تيگەنىنە قاراماستان, سوڭعى دەمى شىققانشا ايقاسىپ, قارسى تاراپتىڭ 70 ساربازىن جەر جاستانداندىرعانى تاريحقا قاتتالعان. بۇگىنگى شارادا قازاقتىڭ باتىر قىزىنىڭ سول ەرلىگى ۇلىقتالدى.
ايانا توعانبەك