وتكەن اپتادا الەمنىڭ ءار قيىرىندا ارالاس جەكپە-جەكتەن بىرقاتار تۋرنير ءوتتى. قازاق جانكۇيەرلەرىنىڭ نازارى اقش-تىڭ ارلينگتون مەن رەسەيدىڭ ەكاتەرينبۋرگ قالالارىنداعى جارىستارعا اۋدى.
مۇحيتتىڭ ارعى بەتىندە جالاۋى جەلبىرەگەن PFL تۋرنيرىندە 29 جاستاعى زامزاگۇل فايزوللانوۆا ءوزىنىڭ تۇساۋكەسەر كەزدەسۋىن وتكىزدى. كەزىندە ەلىمىزدىڭ تانىمال دزيۋدوشىلارىنىڭ ءبىرى بولعان شىعىس قازاقستان وبلىسىنىڭ تۋماسى 2015 جىلدان بەرى ارالاس جەكپە-جەكپەن شۇعىلدانۋدا. «بوپاي» دەگەن بۇركەنشىك ەسىممەن تانىلعان قازاق قىزى سول ارالىقتا سەگىز كەزدەسۋ وتكىزىپ, تەك بىرەۋىندە عانا ۇتىلعان ەدى. بۇل جولى زامزاگۇلدىڭ جولى بولمادى. ول 27 جاستاعى لاريسسا پاچەنكومەن كۇش سىناستى. برازيليا وكىلىنىڭ وسى سپورت ءتۇرىن سەرىك ەتكەلى 10 جىلدان استى. سول كەزدەن بەرى ول 20 رەت وكتاگونعا شىعىپ, 16 مارتە جەڭىس تويىن تويلادى. وكىنىشكە قاراي, ارلينگتوندا وتكەن باسەكە ۇزاققا سوزىلمادى. پاچەنكو ءبىرىنشى راۋندتا-اق فايزوللانوۆانى اۋىر سوققىلاردىڭ استىنا الىپ, ايقىن جەڭىسكە قول جەتكىزدى.
ەكاتەرينبۋرگتەگى RCC 11 تۋرنيرىندە ءىلياس حامزين ۆيكتور فيگەيرەدومەن ايقاستى. رەسەيدىڭ ومبى وبلىسىندا تۋىپ-وسكەن قانداسىمىز قارسىلاسىن ءبىر مينۋتقا جەتكىزبەي ۇرىپ جىقتى. وسىلايشا, ءىلياس قاتارىنان ءتورتىنشى جارىستا برازيليادان كەلگەن سپورتشىلاردى سان سوقتىردى.