ەلورداداعى كونگرەسس-حولل سارايىندا قازاقستانداعى بەلارۋس مادەنيەتى كۇندەرىنىڭ اشىلۋ سالتاناتى ءوتىپ, شارا بارىسىندا جينالعان قالىڭ كوپشىلىك بەلارۋس تەلەگراف اگەنتتىگىنىڭ قورىنان ىرىكتەلىپ الىنعان فوتوسۋرەتتەردىڭ «بۇگىنگى بەلارۋس» اتتى كورمەسى مەن ورەلى ونەر شەبەرلەرىنىڭ كونتسەرتىن تاماشالادى.
باسقوسۋدا ءسوز العان بەلارۋس رەسپۋبليكاسىنىڭ مادەنيەت ءمينيسترى بوريس سۆەتلوۆ «قازاقستان پرەزيدەنتى نۇرسۇلتان نازارباەۆ پەن بەلارۋس پرەزيدەنتى الەكساندر لۋكاشەنكونىڭ باستاماسىمەن ءبىزدىڭ ەلدەرىمىز تەك ساياساتتا عانا ەمەس, سونىمەن قاتار, مادەنيەت سالاسىندا دا ۇلكەن ارىپتەستىككە قول جەتكىزىپ وتىر. بىلتىر بەلارۋس ەلىندە قازاقستاننىڭ مادەني كۇندەرى بولىپ ءوتىپ, سول كەزدە ءبىزدى قازاقتىڭ عاجايىپ ونەرى مەن مادەنيەتى ءتانتى ەتكەن بولاتىن. بۇگىن بەلارۋستىقتار سول يگىلىكتى باستامانى جالعاستىرىپ, استاناعا ەڭ ۇزدىك ونەرپازدارىن الىپ كەلىپ وتىر» دەپ, ونەردى قۇرمەتتەيتىن استانا جۇرتشىلىعىنا ريزاشىلىعىن ءبىلدىردى.
قارىمتا ءسوز كەزەگىندە ءبىزدىڭ ەلدىڭ مادەنيەت ءمينيسترى ارىستانبەك مۇحامەدي ۇلى الىستان ات ارىلتىپ كەلگەن قۇرمەتتى مەيمانداردى قۇتتىقتاي كەلىپ, بۇل ءداستۇر ەكى ەل اراسىنداعى بۇگىنگى تاڭدا ەكونوميكاداعى سياقتى ورەلى ءۇردىستى قامتىعان ىقپالداستىقتىڭ جارقىن كورىنىسى ەكەنىن, بۇل سالتاناتتى شارا ەكى ەلدىڭ ارىپتەستىك قارىم-قاتىناسىن بۇرىنعىدان دا بيىك دەڭگەيگە كوتەرەتىندىگىن اتاپ ءوتتى.
ونەرسۇيەر قاۋىم الدىندا بەلارۋستىڭ جەكەلەگەن ورىنداۋشىلارى مەن شىعارماشىلىق ۇجىمدارى, سونىڭ ىشىندە «پەسنيارى» بەلارۋس مەملەكەتتىك جانە «حوروشكي» حورەوگرافيالىق ءانسامبلى, بەلارۋستىڭ حالىق ارتىستەرى يادۆيگا پوپلاۆسكايا مەن الەكساندر كرەمكو ونەر كورسەتتى.
كامشات جۇباتحانوۆا.
استانا.