كوپ قاباتتى ۇيلەردىڭ «كولىگى» – ليفت. اقتاۋداعى ليفتىلەردىڭ جاعدايى ءبىراز جىلدار كۇردەلى ماسەلەگە اينالعان-دى. ورىندارى قيراي توزىپ, قاڭقالارى قالقيعان ليفتىلەردەن دە, ول ماسەلەنىڭ شەشىلۋىنەن دە جۇرت كۇدەرىن ابدەن ۇزگەندەي ەدى. بىراق, وتكەن جىلى اقتاۋ قالاسىنىڭ اكىمى ە.جاڭبىرشين ليفتىگە بايلانىستى جاقسى جاڭالىقتى جۇرتشىلىققا جاريا ەتتى.
«اقتاۋداعى كوپ قاباتتى ءۇيلەردەگى جۇمىس ىستەمەي تۇرعان ليفتىلەر جاڭارتىلادى». قالا اكىمى تاراپىنان ايتىلعان جاڭالىق جۇرتشىلىققا تەز تارادى. ۋادە ورىندالۋىمەن جاقسى ەمەس پە, بىلتىردىڭ وزىندە قالادا ءتورت جاڭا ليفت ىسكە قوسىلىپ, تۇرعىنداردى قۋانىشقا بولەدى. ليفتىلەندىرۋ ءىسى بيىل دا جالعاسىن تاپتى. ويتكەنى, 2014-2018 جىلدار ارالىعىندا اقتاۋ قالاسىنىڭ تۇرعىن ۇيلەرىنە جاڭا ليفتىلەردى ورناتۋ بويىنشا جاساقتالعان ءىس-شارالار جوسپارى بۇل ىسكە دەم بەردى.
ليفت ارزان دۇنيە ەمەس, ال ونىڭ بايىرعى شاحتالارعا جارايتىن ءتۇرىن تابۋدىڭ ءوزى قيىن ەكەن. كەزىندە ليفتىلەر اقتاۋعا سول كەزدەگى لەنينگراد قالاسىنداعى زاۋىتتان اكەلىنىپتى. بۇل جولى دا اقتاۋلىق ۇيلەردىڭ شاحتاسىنا ىڭعايلى ليفتىلەر ليفت جاساۋعا ماشىقتانعان رەسەيدىڭ سانكت-پەتەربۋرگ قالاسىنداعى زاۋىتتان ساتىپ الىندى. بيىل اقتاۋدا 23 ليفت قوندىرۋ جوسپارلانىپتى.
جۋىردا 2013 جىلدىڭ جەلتوقسان ايىندا ساتىپ الىنعان 8 ءليفتىنى 7 قاباتتى ەكى ۇيگە, 9 قاباتتى ءتورت ۇيگە جانە 11 قاباتتى ەكى ۇيگە ورناتۋ ءۇشىن مەردىگەر مەكەمە انىقتالىپ, مونتاجداۋ جۇمىستارىن باستاپ كەتتى. «اقتاۋ قالالىق ليفت» جشس مونتاجداۋدى ءۇش اي ىشىندە اياقتاپ بەرۋگە ۋادە ەتىپ وتىر. ال قالعان 15 ءليفتىنى ورناتۋ ءۇشىن جۇمىستى جاۋاپكەرشىلىكپەن موينىنا الىپ, جۇرگىزەتىن مەردىگەر مەكەمەلەردى انىقتاۋ كونكۋرستارى وتۋدە.
– 2018 جىلعا دەيىن ليفت قاجەت ەتىلەتىن 108 ۇيگە تولىقتاي ورناتىلادى دەپ كۇتىلۋدە. ولاردى ورناتۋ كەزەگى اقتاۋ قالالىق جۇمىسپەن قامتۋ جانە الەۋمەتتىك باعدارلامالار بولىمىنەن الىنعان مالىمەت نەگىزىندە مۇگەدەك جانداردىڭ سانىنا قاراي جۇزەگە اسىرىلادى, – دەيدى اقتاۋ قالالىق اكىمدىگىنىڭ ءباسپاسوز حاتشىسى باتىر جايلاۋوۆ.
كوپ قاباتتى ۇيلەردە بىرنەشە جىلدار بويى اڭعال-ساڭعال بولىپ تۇرعان ليفت ورىندارى جاڭارىپ, جاڭعىرۋدا. قىزىعىن كورەتىن تۇرعىندار, سوندىقتان ونىڭ بالا-شاعا مەن تەنتەك-تەلىلەردىڭ تەپكىسىنەن, جازۋ-سىزۋ, شيماي-شاتپاقتان تازا بولۋىنا تۇرعىندار اتسالىسسا عوي!
گۇلايىم شىنتەمىرقىزى,
«ەگەمەن قازاقستان».
اقتاۋ.