ۋكرايناداعى قاقتىعىس ءالى جالعاسىپ جاتىر. رەسەي تاراپى دونباستى باعىندىرۋعا بار كۇشىن جۇمىلدىرىپ-اق كەلەدى. الايدا كيەۆ بيلىگى حاركوۆ ماڭىندا قارسى شابۋىلعا شىققانىن مالىمدەدى.
ۋكراينا ۆيتسە-پرەمەرى يرينا ۆەرەششۋك تەلەگرام-كانالىندا ماريۋپولدەگى «ازوۆستال» زاۋىتىنىڭ اۋماعىنان ايەلدەر, بالالار مەن قارتتاردىڭ ەۆاكۋاتسيالانعانىن حابارلادى. ونىڭ ايتۋىنشا, ماريۋپولدەگى گۋمانيتارلىق وپەراتسيانىڭ ءبىرىنشى بولىگى اياقتالدى.
ءساۋىردىڭ اياعىندا بۇۇ باس حاتشىسى انتونيو گۋتتەريش رەسەيگە, ۋكرايناعا بارعان بولاتىن. وسى ساپارى بارىسىندا «ازوۆستال» زاۋىتىندا بۋنكەرگە تىعىلعان قاراپايىم تۇرعىنداردى قاۋىپسىز جەرگە شىعارۋ تۋرالى ۋاعدالاستىق جاسالدى. كەيىننەن تاراپتار اتىستى توقتاتۋعا كەلىسكەن-ءدى. ناتيجەسىندە, بۇۇ مەن قىزىل كرەست ۇيىمى ەۆاكۋاتسيا ۇيىمداستىردى. جالپى سانى 300-دەن استام ادام قاۋىپسىز جەرگە جەتكىزىلدى.
وتكەن سەنبى كۇنى ۋكراينا قارۋلى كۇشتەرى «زمەينىي» ارالى ماڭىندا رەسەيدىڭ اسكەري كەمەسىن اتقىلاعان ۆيدەو جاريالادى. بولجام بويىنشا, بۇل 11 770 «سەرنا» دەسانتتىق كەمەسى بولۋى مۇمكىن. بەينەجازبا Bayraktar TB2 درونى ارقىلى تۇسىرىلگەن. سودان ءبىر كۇن بۇرىن Bayraktar ارقىلى ارالداعى اۋە شابۋىلىنا قارسى قورعانىس جۇيەسىنە جاسالعان سوققىنىڭ ۆيدەوسىن جەلىگە تاراتقان ەدى. ساراپشىلاردىڭ پايىمداۋىنشا, رەسەيلىك «تور» اۋە شابۋىلىنا قارسى قورعانىس جۇيەسى جويىلۋى مۇمكىن.
ۇلىبريتانيا بارلاۋ قىزمەتى ۋكرايناداعى احۋالعا بايلانىستى كەزەكتى قىزىق مالىمەت تاراتتى. سوعان سايكەس, شايقاس كەزىندە رەسەيدىڭ ەڭ زاماناۋي تانكىسى ت-90م-ءنىڭ كەم دەگەندە بىرەۋى جويىلعان. اتالعان ەلدە جالپى سانى 100-گە جۋىق وسى مودەلدە تانك بار. ونى نەگىزىنەن ەڭ ۇزدىك بولىمدەرگە بەرەدى.
ت-90م تانكى 2016 جىلى تانىستىرىلدى. ونىڭ قورعانىسى, زەڭبىرەك جانە سپۋتنيكتىك ناۆيگاتسيا جۇيەلەرى جەتىلدىرىلگەن. جاڭارتىلعان قورعانىس جاۋ قارۋىنا قارسى تۇرۋعا ارنالعان. الايدا ءىس جۇزىندە قانشا جەردەن ماقتاۋلى بولسا دا, قيراپ قالاتىنىنا كۋا بولىپ وتىرمىز.
بارلاۋ قىزمەتىنىڭ پايىمداۋىنشا, رەسەي قارۋلى كۇشتەرىنىڭ قۇرامىنداعى جاۋىنگەرلىك ازىرلىكتە تۇرعان جانە جەتىلدىرىلگەن بولىمشەلەرى ۇلكەن شىعىنعا ۇشىراپ وتىر. رەسەي سوعىستان كەيىن قارۋلى كۇشتەرىن قالپىنا كەلتىرۋ ءۇشىن كوپ ۋاقىت پەن قارجى كەتەدى. ويتكەنى جاڭارتىلعان جانە جەتىلدىرىلگەن جابدىقتى اۋىستىرۋ ءۇشىن شەتەلدەن ميكروەلەكترونيكا اكەلۋ قاجەت. ال قازىرگىدەي رەسەيگە سانكتسيا سالىنعان جاعدايدا بۇعان قول جەتكىزۋ قيىن.
ءوز كەزەگىندە ۋكرايناعا باتىس ەلدەرى جىبەرگەن قارۋ-جاراق ۇرىس الاڭدارىندا قولدانىلا باستادى. ماسەلەن, اقش بەرگەن گاۋبيتسالاردى قولدانۋدى ۇيرەنۋگە كەتكەن ۋكراين ساربازدارى جاتتىعۋىن اياقتاعان. ولار قازىر ءتۇرلى باعىتتاعى شەپتەرگە جىبەرىلە باستادى. سونىڭ اسەرى شىعار, الەۋمەتتىك جەلىلەردە قيراعان رەسەي تەحنيكالارىنىڭ, ارتيللەريالىق شابۋىلداردىڭ ۆيدەولارى كوپتەپ تاراتىلىپ جاتىر.
ال الەمنىڭ ءار تۇكپىرىندە رەسەيگە قاتىستى ارەكەت جالعاسىپ كەلەدى. ماسەلەن, يتاليا بيلىگى جۇما كۇنى «شەحەرازادا» ياحتاسىن كامپەسكەلەدى. ونىڭ يەسى كىم ەكەنى بەلگىسىز. بىراق بۇقارالىق اقپارات قۇرالدارى كەمەنىڭ رەسەي پرەزيدەنتى ۆلاديمير پۋتينگە تيەسىلى ەكەنىن العا تارتادى.
قۇنى 700 ملن دوللار بولاتىن مەگا-ياحتانى يتاليانىڭ قارجى پوليتسياسى تەكسەرە باستاعان ەدى. تەرگەۋ ناتيجەسىندە «شەحەرازاداعا» رەسمي يەلىك ەتەتىن تۇلعا مەن رەسەي ۇكىمەتىنىڭ كورنەكتى وكىلدەرىنىڭ, سونداي-اق رەسەيدىڭ ۋكرايناعا باسىپ كىرۋىنەن كەيىن سانكتسيالارعا ۇشىراعان باسقا دا سۋبەكتىلەر اراسىندا ماڭىزدى ەكونوميكالىق جانە ىسكەرلىك بايلانىستار بار», دەگەن بايلام جاسالعان كورىنەدى.
ايتا كەتەرلىگى, ۋكرايناعا گۋمانيتارلىق كومەك كورسەتۋ ماقساتىندا لوندوندا وتكەن اۋكتسيوندا ۋكراينا پرەزيدەنتى ۆولوديمير زەلەنسكيدىڭ جۇننەن جاسالعان كۇرتەشەسى 90 000 فۋنت ستەرلينگكە (110 000 دوللار) ساتىلدى.
اۋكتسيونعا ۇلىبريتانيا پرەمەر-ءمينيسترى بوريس دجونسون قاتىسىپ, ءسوز سويلەدى. رەسەيدىڭ ۋكرايناعا «ارنايى وپەراتسياسى» باستالعاننان كەيىن-اق الەۋمەتتىك جەلىلەر مەن باق قولدانۋشىلارى زەلەنسكيدىڭ قورشاۋداعى كيەۆتەن شىققان بەيرەسمي ستيلىنە نازار اۋدارا باستاعان-دى. ۋكراينا پرەزيدەنتى جەيدە مەن حاكي ءجۇندى كۇرتە كيىپ جۇرگەن ەدى. بۇل كيىم كوپشىلىكتىڭ نازارىن اۋداردى.