5 مامىردا وزبەكستان شەكاراشىلارى قىرعىزستاننىڭ ءۇش ازاماتىنا قارسى قارۋ قولدانعان, دەپ حابارلايدى Egemen.kz 24.kg اقپاراتتىق اگەنتتىگىنە سىلتەمە جاساپ.
وقيعا دجالال-اباد وبلىسى الا-بۋكا اۋدانى اكتام اۋىلدىق اكىمشىلىگىنە قاراستى دوبو-كورگون ەلدى مەكەنىندە بولعان. ءۇش قىرعىزستاندىق وق جاراقاتىن الىپ, الا-بۋكا اۋدانىنداعى اۋرۋحاناعا جەتكىزىلگەن. سول جەردە ولار ەسىن جيماستان قازا بولعان.
«وقيعانىڭ ءمان-جايىن انىقتاۋ ءۇشىن الا-بۋكا باعىتى بويىنشا قىرعىز رەسپۋبليكاسىنىڭ شەكارا وكىلى وزبەكستاننىڭ يانگي-كۋرگان باعىتى بويىنشا شەكارا وكىلىمەن كەزدەسۋ وتكىزدى. تاراپتار قىزمەتتىك تەكسەرىس قورىتىندىسى بويىنشا كەزدەسۋدى 6 مامىردا جالعاستىرۋعا كەلىستى. دەرەك بويىنشا تەرگەۋ امالدارى باستالدى», دەدى قىرعىزستان مەملەكەتتىك ۇلتتىق قاۋىپسىزدىك كوميتەتىنىڭ شەكارا قىزمەتى وكىلدەرى.