پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ اتباساردا سۋ تاسقىنىنىڭ ورىن الۋىنا بايلانىستى وڭىرگە جۇمىس ساپارىمەن كەلدى. ول قالا تۇرعىندارىمەن كەزدەسىپ, سۋ شايعان تۇرعىن ۇيلەردە, كوشەلەر مەن كولىك ينفراقۇرىلىمدارىندا بولدى.
– ماعان وبلىس اكىمدىگىنەن بەرىلگەن دەرەك بويىنشا 44 ءۇي قالپىنا كەلتىرۋگە جارامايدى. باسپاناسىز قالعاندار ءۇشىن جاڭا تۇرعىن ۇيلەر سالىناتىن بولادى, زارداپ شەككەن وزگە ازاماتتارعا كوميسسيانىڭ قورىتىندى شەشىمىمەن ءتيىستى قارجى بولىنەدى. ەشكىم دە نازاردان تىس قالمايدى. ءبىز بۇل جاعدايلاردى تەز ارادا شەشۋگە تىرىسامىز. مەملەكەت باسشىسى اتباسارداعى جاعدايدى باقىلاۋدا ۇستاپ وتىر, – دەدى ول جۇرتشىلىقپەن كەزدەسۋدە.
باقىتجان ساعىنتاەۆ اتباسارداعى جەدەل شتابتا توتەنشە جاعدايلار ءمينيسترى ۆلاديمير بوجكو, اقمولا وبلىسىنىڭ اكىمى قوسمان ايتمۇحامەتوۆ, قارجى, كولىك جانە كوممۋنيكاتسيا ۆيتسە-مينيسترلەرى بەرىك شولپانقۇلوۆ, مەرەكە پىشەمباەۆ, وڭىرلىك دامۋ مينيسترلىگىنىڭ كوميتەت توراعاسى ۆلاديسلاۆ گالليەۆ پەن قورشاعان ورتا جانە سۋ رەسۋرستارى مينيسترلىگى كوميتەت توراعاسىنىڭ مىندەتىن اتقارۋشى بولات بەكنيازدىڭ قاتىسۋىمەن ءماجىلىس وتكىزدى. وندا وبلىس اكىمى قوسمان ايتمۇحامەتوۆ پەن توتەنشە جاعدايلار ءمينيسترى ۆلاديمير بوجكونىڭ اعىمداعى جاعدايلارعا قاتىستى ەسەپتەرى تىڭدالدى.
–تۇرعىندارعا مەديتسينالىق جانە پسيحولوگيالىق كومەك كورسەتىلۋدە, –دەدى ءوڭىر باسشىسى ق.ايتمۇحامەتوۆ. – اۋلالار مەن كوشەلەردى سۋدان تازارتۋ, تارتىپكە كەلتىرۋ جۇمىستارى جۇرگىزىلۋدە. بۇگىنگى كۇنى ەۆاكۋاتسيالىق پۋنكتتە 19 ادام تۇرىپ جاتىر.
وسىعان قاتىستى, پرەمەر-ءمينيستردىڭ ءبىرىنشى ورىنباسارى وڭىردە سۋ تاسقىنىنان بەلگىلى دارەجەدە كۇردەلى جاعداي قالىپتاسقانىن اتاپ ءوتتى. ۇكىمەت پەن وبلىس اكىمدىگى تاراپىنان زارداپ سالدارىن جويۋ جۇمىستارى جۇرگىزىلۋدە. قازىرگى تاڭدا تىرشىلىكتى قامتاماسىز ەتۋ مەن قاۋىپسىزدىك شارالارى قاتاڭ باقىلاۋدا ۇستالۋى قاجەت. سونداي-اق, باقىتجان ساعىنتاەۆ ءتيىستى مينيسترلىكتەر مەن وبلىس اكىمدىگىنە تابيعات اپاتىنان زارداپ شەككەن عيماراتتاردى قالپىنا كەلتىرۋگە جۇمسالاتىن قارجى ءبولىنۋى ءجونىندە ۇسىنىس دايىنداۋدى تاپسىردى.
وبلىس اكىمى قوسمان ايتمۇحامەتوۆتىڭ مالىمدەۋىنشە, العاشقى كەزەكتە جارتى ميلليارد تەڭگە قارجى قاجەت. ونىڭ ەسەپتەۋىنشە, 490 ميلليون تەڭگە 44 جاڭا تۇرعىن ءۇي سالۋعا جانە 10 ميلليون تەڭگە ينفراقۇرىلىمدى قالپىنا كەلتىرۋگە جۇمسالماق. زەرتتەۋ جۇمىستارىنان كەيىن سۋدا قالعان تاعى دا 146 ۇيگە قاتىستى قوسىمشا ەسەپ جۇرگىزىلەدى.
ۇكىمەت باسشىسىنىڭ ءبىرىنشى ورىنباسارى ب.ساعىنتاەۆ قارجى ءتيىستى قۇجاتتامالىق نەگىزگە ساي بولىنەتىنىن ايتتى.
بۇگىنگى كۇنى اتباسار قالاسىندا اپات سالدارىن جويۋ جۇمىسىمەن 500 ادام, 87 تەحنيكا مەن سۋ سورعىش قۇرالدار ءتاۋلىك بويى اينالىسۋدا. كومەك قورى قۇرىلىپ, ارنايى ەسەپشوت اشىلعان.
باقبەرگەن امالبەك,
«ەگەمەن قازاقستان».
اقمولا وبلىسى.