تجم اۋە پاركى جاڭا H-145 تىكۇشاعىمەن تولىقتى

ال قۇراستىرۋ جۇمىستارى يدم «قازاقستان ينجينيرينگ» ۇك» اق مەن «Airbus Helicopters» بىرلەسكەن جوباسى – «Eurocopter Kazakhastan Engineering» جشس زاۋىتىندا ورىندالعان. بۇل تمد اۋماعىنداعى اتالعان تىكۇشاق تۇرلەرىن قۇراستىرۋ مەن تەحنيكالىق قولداۋ كورسەتەتىن جالعىز ءوندىرىس ورنى.

2022 جىلعى 4 مامىردا H-145 «Airbus Helicopters» جاڭا تىكۇشاعىنىڭ تانىستىرىلىمىنا  توتەنشە جاعدايلار ءمينيسترى يۋري يلين, يدم ازاماتتىق اۆياتسيا كوميتەتىنىڭ توراعاسى تالعات لاستاەۆ, «قازاقستاننىڭ اۆياتسيالىق اكىمشىلىگى» اق باس ديرەكتورى كاتالين رادۋ, «قازاقستان ينجينيرينگ» ۇك» اق باسقارما توراعاسى تەمىرجان ءابدىراحمانوۆ, «Airbus Helicopters» ۆيتسە-پرەزيدەنتى توماس زەمان جانە «Eurocopter Kazakhastan Engineering» جشس باس ديرەكتورى باستەت كلەمانس ماري قاتىستى.

H-145 – قوس قوزعالتقىشتى Airbus تىكۇشاقتارى تۇرىنە جاتادى. جولاۋشى سىيىمدىلىعى – 9 ادامعا دەيىن جانە ورىن كونفيگۋراتسياسىن جىلدام وزگەرتۋ مۇمكىندىگى بار. الەم بويىنشا 1500-دەن استام اتالعان تىكۇشاق تۇرلەرى پايدالانۋعا بەرىلگەن جانە جالپى ۇشۋ ۋاقىتى 6 ميلليون ساعاتتان استام ۋاقىتتى قۇرايدى. اۋە كولىگىنىڭ ساپاسى الەمدىك جەتەكشى ءوندىرۋشى كومپانيالاردىڭ تالاپتارى مەن ەۋروپالىق اۋە ناۆيگاتسياسىنىڭ قاۋىپسىزدىك ۇيىمىنىڭ (EASA) ۇشۋ جارامدىلىق نورمالارىنا تولىعىمەن سايكەس كەلەدى.

تىكۇشاق قالاقشاسىنداعى 5 بۇراندا ارنايى توپسالار مەن شاريكتى ىشپەكتەرسىز قۇراستىرىلعاندىقتان H-145-تە ۇشۋ كەزىندەگى ءدىرىل ايتارلىقتاي تومەندەگەن. بۇل ءوز كەزەگىندە جولاۋشىلاردىڭ جايلىلىق دەڭگەيىن ارتتىرىپ قانا قويماي, ءدىرىلدى باسەڭدەتۋ جۇيەسىنەن تولىعىمەن باس تارتۋعا مۇمكىندىك بەردى. ناتيجەسىندە پايدالى جۇك كولەمى 150 كەلىگە دەيىن ارتتى. قازىرگى كۇندە H-145 ءوز كلاسى بويىنشا ەڭ جوعارى جۇك تاسىمالدايتىن تىكۇشاق سانالادى. اۋە كولىگى 2019 جىلعى قىركۇيەكتە بيىكتىگى 6 961 مەتردى قۇرايتىن اند تاۋىنىڭ ەڭ بيىك شىڭى اكونكاگۋاعا قوندى.

تىكۇشاقتى ىزدەستىرۋ-قۇتقارۋ شارالارىنا, تۇرعىندارعا جەدەل مەديتسينالىق كومەك كورسەتۋ, سانيتارلىق ءىس-شارالاردى جۇرگىزۋ جۇمىستارىندا, سونداي-اق ورمان قورىن كۇزەتۋ جانە قورعاۋعا پايدالانۋ جوسپارلانىپ وتىر.

جاڭا تىكۇشاقتى ءتيىمدى باسقارۋدى مەڭگەرۋ ءۇشىن تجم اۆياتسيالىق قۇرىلىمى – «كازاۆياسپاس» اق-نىڭ ۇشۋ جانە تەحنيكالىق قۇرامى گەرمانيادا تەوريالىق جانە پراكتيكالىق بىلىكتىلىگىن جەتىلدىردى.

جالپى ايتقاندا, وتاندىق اۋە كەمەلەرىن كەڭىنەن پايدالانۋ – ەلىمىزدىڭ قورعانىس-ونەركاسىپتىك كەشەنىن دامىتۋدىڭ باستى فاكتورى بولىپ تابىلادى.

بۇگىندە تجم اۆيپاركىن نەگىزىنەن وتاندىق جانە شەتەلدىك اۋە كەمەلەرى قۇرايدى. ولاردىڭ قاتارىندا Airbus EC-145,H-145, H-130 تىكۇشاقتار توبى, مي-8 تۇرلەرى مەن مي-26ت جانە كا-32 بار.