رەسەي فەدەراتسياسىنداعى حاكاسيا پارلامەنتىنىڭ توراعاسى ۆلاديمير شتىگاشەۆ قازاقستان حالقى تاراپىنان تۇسىنىسپەۋشىلىك تۋعىزعان ءوزىنىڭ جك پرەزيديۋمىنداعى ايتقان سوزدەرىنە قاتىستى مالىمدەمە جاسادى. بۇل تۋرالى قازاقپارات حابارلادى.
ەسكە سالا كەتەيىك, جەرگىلىكتى باسىلىمداردىڭ ءبىرى جوعارى كەڭەس توراعاسىنىڭ مىنا ءبىر ءسوزىن كەلتىرگەن بولاتىن: «شىعىس قازاقستان وبلىسى, نەمەسە كەندى التاي. كەندى التاي ءار كەزدە دە رەسەي قۇرامىندا بولعان. قازاقستاننىڭ ءوز جەرى نەگىزى از ەدى. وسى جەردى بەرۋ جونىندە شەشىم قابىلداندى, سول كەزدە ءوتىپ كەتكەن... ءبىز قازاقستانعا 5 وبلىستى بەردىك...».
پارلامەنت ءباسپاسوز قىزمەتى ونىڭ سوزدەرىندە ەشقانداي ساياسي استار بولماعاندىعىن ايتىپ سەندىرۋگە تىرىستى.
ەندى شتىگاشەۆ بۇل ماسەلەگە قاتىستى ءوزىنىڭ جەكە پىكىرىن ءبىلدىرىپ وتىر. ونىڭ مالىمدەمەسىن حاكاسيا باسشىسىنىڭ اكىمشىلىگى تاراتتى:
«جەكەلەگەن بۇقارالىق اقپارات قۇرالدارى تاراتقان مەنىڭ بىرقاتار پىكىرلەرىم ەكىۇشتى تۇسىنىك قالىپتاستىرعانىنا وكىنىشتىمىن.
مەن تاتۋ-ءتاتتى ءارى كوپۇلتتى ۇجىمى بار بالالار ۇيىندە تاربيەلەندىم. ول سوعىستان كەيىنگى ۋاقىت بولاتىن. سودان بەرى كوپتەگەن وزگە ۇلتتى دوستارىممەن ءالى كۇنگە دەيىن قارىم-قاتىناسىمدى ۇزگەن جوقپىن. ءبىز ورتاق ءتىل تابىسىپ, ءبىر-ءبىرىمىزدىڭ ءداستۇرىمىزدى جانە تۇپكى شىققان ۇلتىمىزدى قۇرمەتتەدىك.
رەسەي يمپەرياسىنىڭ, كەيىن كسرو-نىڭ شەكاراسى قالاي وزگەرگەندىگى تۋرالى تاريحي تۇرعىداعى وي-پىكىرلەرىم وسىنداي وعاش قابىلدانعانىنا قاتتى تاڭقالامىن. ەشبىر مەملەكەتكە, سونىڭ ىشىندە قازاقستانعا تاريحي قۇقىق پەن اۋماقتىق نارازىلىق تۋرالى ەشقاشان ايتقان ەمەسپىن. ولار ءبىزدىڭ كورشى, ءبىزدىڭ دوسىمىز جانە ارىپتەسىمىز. مەنىڭ سوزدەرىم ەل اراسىندا تۇسىنىكسىزدىك تۋعىزىپ, باۋىرلاس حالقىمىزدىڭ كوڭىلىنە قاياۋ تۇسىرگەنى مەنى قاتتى قىنجىلتادى. ەگەر مەن ءوزىمنىڭ سوزدەرىممەن بىرەۋدى لاجسىز رەنجىتسەم, شىن كوڭىلىممەن كەشىرىم سۇرايمىن».
ساكەن مايلىباي.
دەرەككوز: قازاقپارات.