مينەرالدىق-شيكىزات بازاسىن تولىقتىرۋ, گەولوگيالىق زەردەلەۋدى ارتتىرۋ, جۇمىس ىستەپ تۇرعان ءوندىرىس ورىندارىن شيكىزاتپەن قامتاماسىز ەتۋ جانە جاڭا ءوندىرىس ورىندارىن قۇرۋ ماقساتىندا يندۋستريا جانە ينفراقۇرىلىمدىق دامۋ مينيسترلىگىمەن جەر قويناۋىن پايدالانۋ قۇقىعى بەرىلەدى, دەپ حابارلايدى Egemen.kz.
بۇل تۋرالى ۇكىمەت وتىرىسىندا بايانداما جاساعان يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ مالىمدەدى.
2021 جىلدىڭ قورىتىندىسى بويىنشا بۇل ماقساتتا 1700-دەن استام ليتسەنزيا بەرىلىپ, 800-گە جۋىق وتاندىق يۋنيورلىق كومپانيا قۇرىلعان. بۇگىندە جۇمىس ىستەپ تۇرعان ءوندىرىس ورىندارىن شيكىزاتپەن قامتاماسىز ەتۋ ءۇشىن وتاندىق بيزنەس وكىلدەرى كەن ورىندارىن بارلاۋ بويىنشا مىندەتتەمەلەر الىپ وتىر. جالپى 2018 جىلدان باستاپ جەر قويناۋىن پايدالانۋ سالاسىنا شامامەن 7 ترلن تەڭگە ينۆەستيتسيا تارتىلعان. جىل سايىن 38,6 ملن توننا تەمىر رۋداسى, 1,4 ملن توننا اليۋميني توتىعى وندىرىلەدى, سونداي-اق 2,7 ملن توننا مىس كونتسەنتراتى مەن 193 مىڭ توننا قورعاسىن كونتسەنتراتى شىعارىلادى.
«مەملەكەت باسشىسىنىڭ تاپسىرماسىنا سايكەس قازىر بارلىق كەن ورنىن تەكسەرىپ جاتىرمىز. بۇگىندە قاتتى پايدالى قازبالار بويىنشا جەر قويناۋىن پايدالانۋ سالاسىندا 499 كەلىسىمشارت جانە 1738 ليتسەنزيا ىسكە اسىرىلۋدا. جەر قويناۋىن پايدالانۋعا بۇرىن-سوڭدى بەرىلگەن قولدانىستاعى بارلىق كەلىسىمشارت پەن ليتسەنزيالارعا تالداۋ جاسالدى. بۇل 2 مىڭنان استام قۇجات. وسىلايشا, 118 ليتسەنزيانىڭ قولدانىلۋى توقتاتىلدى. تالداۋ قورىتىندىسى نەگىزىندە قولدانىستاعى 1620 ليتسەنزيا بويىنشا ءتيىستى شارالار قابىلداناتىن بولادى», دەپ اتاپ ءوتتى قايىربەك وسكەنباەۆ.
ەندىگى كەزەكتە مىندەتتەمەلەردى ورىنداۋ كورسەتكىشتەرى 100 پايىزدان تومەن سانالاتىن جەر قويناۋىن پايدالانۋشىلار تەكسەرىلەتىن بولادى.
ءمينيستردىڭ اقپاراتىنا سايكەس, جاڭا شارتتار بويىنشا ءاربىر جەر قويناۋىن پايدالانۋشى وڭىرلىك الەۋمەتتىك جوبالارعا قاتىسىپ, جاڭا ءوندىرىس ورىندارىن قۇراتىن بولادى. سونىمەن بىرگە, جۇمىس ىستەپ تۇرعان وندىرىستەردى جاڭعىرتىپ, قوسىمشا جۇمىس ورىندارىن اشادى جانە وتاندىق وندىرىستىك كاسىپورىنداردى شيكىزاتپەن قامتاماسىز ەتەدى.
ايتا كەتسەك, يندۋستريا جانە ينفراقۇرىلىمدىق دامۋ مينيسترلىگى ەكولوگيا مينيسترلىگىمەن بىرلەسىپ, قازاقستان جەر قويناۋىن پايدالانۋ ءۇشىن قولجەتىمدى بارلىق اۋماقتى مەملەكەتتىك جەر قويناۋى قورىن باسقارۋ باعدارلاماسىنا قوسۋ ماسەلەسىن پىسىقتاپ جاتىر. بۇل گەولوگيالىق بارلاۋ جۇمىستارىن جانداندىرۋ, سونداي-اق قاتتى پايدالى قازبالار مەن كەڭ تارالعان پايدالى قازبالار بويىنشا پايدالانىلمايتىن كەن ورىندارىن يگەرۋ ماقساتىندا قولعا الىنعان شارا.