2025 جىلعا دەيىن 33 ملرد تەڭگەگە 9 توپتىق سۋ قۇبىرى سالىنادى, دەپ حابارلايدى Egemen.kz. بۇل تۋرالى بۇگىن ۇكىمەت وتىرىسىندا ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ ايتتى.
«قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا 2025 جىلعا دەيىن جالپى قۇنى 33 ملرد تەڭگە بولاتىن 9 توپتىق سۋ قۇبىرىن سالۋ جانە قايتا جاڭارتۋ جوسپارلانىپ وتىر. جالپى, 2025 جىلعا قاراي شامامەن 1,2 مىڭ شاقىرىم توپتىق سۋ قۇبىرى سالىنىپ, 22,3 مىڭ ادامى بار 41 اۋىلدىق ەلدى مەكەن ساپالى اۋىز سۋمەن قامتاماسىز ەتىلەدى جانە 33 مىڭ ادام تۇراتىن 52 اۋىلدىق ەلدى مەكەندە سۋمەن جابدىقتاۋ جاقسارتىلادى», دەدى مينيستر.
ءسوز سوڭىندا سەرىكقالي برەكەشەۆ ەلدى مەكەندەردى ساپالى اۋىز سۋمەن قامتاماسىز ەتۋ جۇمىستارى مينيسترلىكتىڭ تۇراقتى باقىلاۋىندا تۇرعانىن باسا ايتتى.
ايتا كەتەيىك, ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ تا كوتەرىلگەن ماسەلەگە قاتىستى بايانداما جاساپ, 2025 جىلعا دەيىن ەل تۇرعىندارى 100 پايىز ساپالى اۋىز سۋمەن قامتاماسىز ەتىلەتىنىن ايتقان بولاتىن.
ايانا توعانبەك