قىرعىز رەسپۋبليكاسىنان كەلە جاتقان جۇك كولىگىنەن بەلارۋس رەسپۋبليكاسىنىڭ 1,1 ملن جالعان اكتسيز ماركالارى تابىلدى. بۇل تۋرالى مەملەكەتتىك كىرىستەر كوميتەتى ءمالىم ەتتى, دەپ حابارلايدى Egemen.kz.
قىرعىز رەسپۋبليكاسىنىڭ سىرتقى ەكونوميكالىق قىزمەتىنىڭ جوسىقسىز قاتىسۋشىلارى ەكى ەلدىڭ اراسىنداعى ۋاعدالاستىقتى پايدالانا وتىرىپ, قازاقستانعا دەكلاراتسيالانباعان, كونترافاكتىلىك جۇك اكەلۋ ءۇشىن وزدەرىنىڭ جاسىرىن سحەماسىن قولدانادى. مىسالى, 28 ساۋىردە قىرعىز رەسپۋبليكاسىنان كەلە جاتقان جۇك كولىگىن تەكسەرۋ كەزىندە بەلارۋس رەسپۋبليكاسىنىڭ 1,1 ملن جالعان اكتسيزدىك ماركالارى انىقتالدى. بۇل ءىس ماتەريالدارى جامبىل وبلىسى بويىنشا ەكونوميكالىق تەرگەۋ دەپارتامەنتىنە جىبەرىلدى.
سونداي-اق, اتالعان كولىكتەن 2 مىڭنان استام دەكلاراتسيالانباعان تاۋار (بەينەباقىلاۋ جۇيەسى, كيىم-كەشەك جانە سپورتتىق قۇرال-جابدىقتار) تابىلدى. باقىلاۋدى السىرەتۋدىڭ سالدارىنان زاڭبۇزۋشىلىقتار ايتارلىقتاي ءوستى جانە قىرعىز رەسپۋبليكاسىنان قۇجاتتارعا سايكەس قازاقستان ارقىلى رەسەي فەدەراتسياسىنا ترانزيتپەن وتۋگە ءتيىستى ماينينگ قۇرال-جابدىقتارى مەن ەلەكتروندى تەمەكى اكەلۋ فاكتىلەرى جيىلەي تۇسكەن.
ءساۋىر ايىندا ماينينگ قۇرال-جابدىقتارى بويىنشا جالعان ءترانزيتتىڭ 6 فاكتىسى انىقتالدى, ياعني ترانزيت دەپ مالىمدەلگەن تاۋارلار قازاقستان اۋماعىندا قالعان. كاسىپكەرلىك سۋبەكتىلەرىنىڭ مۇنداي ارەكەتتەرى ەاەو-داعى سەرىكتەس ەلدەردىڭ بيۋدجەتىنە زيان كەلتىرەدى, سوندىقتان باقىلاۋ كۇشەيتىلەتىندىگىن ايتا كەتۋ كەرەك.