برازيليانىڭ كاشياس-دۋ-سۋل قالاسىندا جازعى سۋرداليمپيا-دانىڭ سالتاناتتى اشىلۋ ءراسىمى ءوتتى. بايراقتى باسەكەدە الەمنىڭ 100 ەلىنەن 3500-گە جۋىق اتلەتتەر سپورتتىڭ 21 تۇرىنەن باق سىنايدى, دەپ حابارلايدى Egemen.kz.
سۋردليمپياداعا قازاقستان اتىنان 65 سپورتشى سپورتتىڭ توعىز تۇرىنەن, اتاپ ايتقاندا, ۇستەل تەننيسى, ءجۇزۋ, كاراتە-دو, تاەكۆاندو, دزيۋدو, جەڭىل اتلەتيكا, گرەك-ريم, ەركىن كۇرەس جانە بادمەنتوننان ەل نامىسىن قورعايدى.
سالتاناتتى ءىس-شارادا ەلىمىزدىڭ كوك بايراعىن سامسۋندا (تۇركيا) وتكەن XXIII جازعى سۋردليمپيادانىڭ چەمپيونى, الەم چەمپيوناتىنىڭ جۇلدەگەرى, تاەكۆوندوشى ايان ءابدىراش الىپ شىقتى.
– وسىنداي ءىرى حالىقارالىق دودادا ەلىمنىڭ بايراعىن الىپ شىعۋ ماعان تاپسىرىلدى. بۇل مەن ءۇشىن ۇلكەن مارتەبە. سۋردليمپياداعا تىڭعىلىقتى دايىندالدىم. بار كۇش-جىگەرىمدى سالىپ وزىمە ارتىلعان ءۇمىتتى اقتايمىن دەگەن ويدامىن, – دەدى ا.ءابدىراش.
ايتا كەتەتىن جايت, سامسۋن قالاسىندا (تۇركيا) وتكەن XXIII جازعى سۋردليمپيادادا قازاقستاندىق سپورتشىلار سپورتتىڭ سەگىز تۇرىنەن (ەركىن كۇرەس, گرەك-ريم, دزيۋدو, تاەكۆوندو, كاراتە, ءجۇزۋ, جەڭىل اتلەتيكا, ۇستەل تەننيسى) ونەر كورسەتكەن بولاتىن. 1 التىن, 1 كۇمىس جانە 5 قولا مەدالدى جەڭىپ العان قازاقستان ۇلتتىق قۇراماسى جالپىكوماندالىق ەسەپتە 25-ورىنعا يە بولدى.
ححIV سۋردليمپيادادا وتانداستارىمىزعا مول ءۇمىت ارتاتىنىن ايتقان قازاقستان رەسپۋبليكاسى سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى بەكبولات بايجانوۆ بۇل سىندا دا سپورتشىلارىمىز لايىقتى ناتيجەگە جەتەدى دەگەن ويدا.
– قازاقستان قۇراماسى وسىمەن التىنشى مارتە جازعى سۋردليمپياداعا قاتىسىپ وتىر. وتاندىق سپورتشىلارىمىز وسىعان دەيىنگى جارىستاردا جۇلدەلى ورىنداردان كورىنىپ ءجۇر. بۇل سىندا دا لايىقتى ناتيجە قول جەتكىزەدى دەگەن ويدامىز. بارشا قازاقستاندىقتاردى ۇلتتىق قۇراماعا جانكۇيەر بولۋعا شاقىرامىز, – دەدى بەكبولات قۇستۇتىن ۇلى.
ايتا كەتەيىك, ەستۋ قابىلەتى تومەن سپورتشىلار اراسىنداعى وليمپيادادا سپورت تۇرلەرىن قولداۋ ماقساتىندا مەملەكەت تاراپىنان بەرىلەتىن قارجىلاي سىياقى مولشەرى وليمپيادا جانە پاراليمپيادامەن تەڭەستىرىلگەن بولاتىن. ياعني, اتالمىش جارىستان ءبىرىنشى ورىن العان سپورتشىعا – 250 000, ەكىنشى ورىن – 150 000, ءۇشىنشى ورىن – 75 000, ءتورتىنشى ورىن – 30 000, بەسىنشى ورىن – 10 000 جانە التىنشى ورىن ءۇشىن 5 000 اقش دوللارى بەرىلەدى.
جازعى سۋردليمپيادا مامىر ايىنىڭ 15-نە دەيىن جالعاسادى.