مەملەكەت باسشىسى قاسىم-جومارت توقاەۆتىڭ اتا زاڭعا وزگەرىستەر مەن تولىقتىرۋلار ەنگىزۋ جونىندە رەسپۋبليكالىق رەفەرەندۋم وتكىزۋ تۋرالى ۇسىنىسىنا سەنات دەپۋتاتتارى قولداۋ ءبىلدىرىپ, پىكىرلەرىمەن ءبولىستى, دەپ حابارلايدى Egemen.kz.
«جاڭا قازاقستاندا قوعامنىڭ پىكىرى – الدىڭعى ورىندا. پرەزيدەنتىمىز ءوزىنىڭ وسى باستاماسى ارقىلى ازاماتتاردى ەل ومىرىنە بەلسەنە ارالاسۋعا شاقىرىپ وتىر. بۇل قادام, ءبىر جاعىنان, بيلىك پەن قوعامنىڭ اراسىنداعى السىرەگەن سەنىمدى نىعايتۋعا دا وڭ ىقپالىن تيگىزەتىنى انىق. مەملەكەت باسشىسى قازاقستاندى دەموكراتيالىق قۇندىلىقتار نەگىزىندە نىعايتۋعا ءمان بەرىپ وتىر. پرەزيدەنتىمىزدىڭ تىكەلەي باستاماسىمەن قولعا الىنعان رەفورمالاردىڭ دەنى ساياسي ترانسفورماتسيانى كوزدەيدى. كونستيتۋتسيالىق وزگەرىستەردى تۇتاس ۇلتتىڭ تالقىسىنا سالۋ باستاماسىن دا دەموكراتياعا نەگىزدەلگەن ساياسي جاڭارۋدىڭ بەلگىسى دەپ قابىلدايمىن», دەدى سەناتور بەيبىت يساباەۆ.
ال, سەناتور مۇرات باقتيار ۇلى ءوز كەزەگىندە وسىنداي رەفەرەندۋمنىڭ 27 جىل بۇرىن وتكەنىن ايتا كەلىپ, ول كەزدە قولدانىستاعى اتا زاڭىمىز قابىلدانعانىنا توقتالدى.
«شىنىندا دا ەكىنشى كونستيتۋتسيانى 1995 جىلى 30 تامىزدا جالپىحالىقتىق رەفەرەندۋم ارقىلى قابىلدانعان ەدى. سودان بەرى 27 جىل ۋاقىت ءوتىپتى. وعان قانشاما وزگەرتۋلەر ەنگىزىلدى. قازىر جاعداي مۇلدەم بولەك. پرەزيدەنتتىڭ باستى ۇستانىمى حالىقتىڭ ۇنىنە قۇلاق اساتىن ءبىر - بىرىنە تاۋەلسىز اتقارۋشى, زاڭ شىعارۋشى جانە سوت بيلىگىن ورناتۋ. بۇكىل وركەنيەتتى ەلدەردىڭ ۇستانىمى وسىنداي. دەموكراتيانىڭ بۇدان باسقا جولى جوق. سوندىقتان دا پرەزيدەنتىمىزدىڭ جالپىحالىقتىق رەفەرەندۋم ارقىلى اتا زاڭعا وزگەرىستەر ەنگىزۋ ۇسىنىسى - كەلەشەك تاريحي-ساياسي شەشىم بولىپ قالاتىنى ءسوزسىز», دەدى ول.
سەناتور اقمارال ءالنازاروۆا ءوز كەزەگىندە كونستيتۋتسياعا ەنگىزىلۋ جوسپارلانعان بۇل تۇزەتۋلەر ىرگەلى سيپاتقا يە ەكەنىن جانە ەلدىڭ ساياسي جۇيەسىن تۇبەگەيلى وزگەرتەتىنىن اتاپ ءوتتى.
ء«وز باسىم بۇل ۇسىنىستى قۇپتارلىق دەپ كورەم, سەبەبى بۇل رەفەرەندۋم پرەزيدەنتىمىزدىڭ «حالىقتىڭ ۇنىنە قۇلاق اساتىن مەملەكەت» كونتسەپتسياسىنىڭ جالعاسى رەتىندە سياقتى. ونداعى باستى يدەيا ازاماتتىڭ مۇددەلەرى باستى ورىنعا شىعاتىن, وندا مەملەكەتتىك ورگانداردىڭ ازاماتتارمەن ءوزارا ارەكەتتەسە وتىرىپ, ازاماتتاردىڭ شەشىم قابىلداۋ جانە ولاردىڭ باقىلاۋ پروتسەسىنە تارتىلۋىنا مۇمكىندىك بەرەتىن كەدەرگىسىز مەملەكەت قۇرۋ دەپ بىلەمىن», دەدى سەناتور.