قازاقتان شىققان تۇڭعىش وليمپيادا چەمپيونى جاقسىلىق ۇشكەمپىروۆتى ەلىمىزدە بىلمەيتىن ادام جوق. شاپ-شاعىن عانا تومپيعان, قاراتورى جۇزىنەن مەيىرىم توگىلىپ تۇرعان جان. «تۇڭعىش وليمپيادا چەمپيونى» دەگەن تاۋ قوپارارداي اتاعى بولا تۇرسا دا, قاراپايىم. ەشقاشان اسىپ-تاسقان ەمەس. قاشاندا بىرقالىپتى. تاۋەلسىزدىك العان جىلدارى جاكەڭنىڭ دە جاعدايى اسا ءماز ەمەس بولاتىن. تەگىن ادام وليمپيادا چەمپيونى بولماسا كەرەك-ءتى. اللانىڭ نۇرى تۇسكەن جان قازىر باقۋاتتى. شارۋاشىلىعى ورگە دومالاپ, مەرەيى تاسىپ تۇرعان وبلىسىمىزداعى بەدەلدى كاسىپكەرلەردىڭ ءبىرى.
ەكەۋمىز ويلاماعان جەردەن كەزدەسىپ, ءبىراز اڭگىمەلەسىپ قالدىق.
«العاش, ورتا مەكتەپتى ءبىتىرگەن جىلى وقۋعا ءتۇسۋ ءۇشىن الماتى قالاسىنداعى جوعارى وقۋ ورىندارىنا بارۋعا جاعدايىم كەلمەي, سەمەيگە باردىم, – دەيدى بالۋان. شەشەم جيعان-تەرگەن تيىن-تەبەنىن دورباعا سالىپ, شالبارىمنىڭ ىشقىرىنا تۇيىنشەكتەپ, بايلاپ بەرگەن بولاتىن. سەمەيگە كەلگەننەن كەيىن دە جاتاتىن ورىن تاپپاي تەمىر جول بەكەتىنە ەكى-ءۇش كۇن تۇنەدىم. ءسويتىپ ءجۇرىپ, جالداپ تۇراتىن ءبىر ءۇي تاپتىق. ينستيتۋتقا قۇجاتتارىمدى وتكىزىپ, ەرتىستىڭ جاعاسىنا بارسام ءبىر شال وتىر. ول وزەنگە شومىلاتىن جاستاردان اقشا جيناپ, ولاردى جۇزۋدەن جارىستىرادى ەكەن. مەن دە بارىپ, ءۇش سوم بەردىم. الگى شال مەنىڭ ءتۇر-تۇرپەتىمە قاراپ سەن جارىسقا قاتىناسپاي-اق قوي, دەپ اقشامدى قايتارىپ جاتىر. قوياردا-قويماي, سۋعا جۇزۋدەن جارىساتىنىمدى ايتىپ, اقشامدى قايتا وتكىزدىم.
شومىلۋشىلاردىڭ اراسىندا جارىس باستالدى. مالتىپ كەلەمىن. ارتىما قاراعانىم جوق. جاعاعا جەتكەندە ءبىر-اق تىنىس الدىم. ارتىما قاراسام, جارىسۋشىلار كوپ ارتتا قالىپ قويىپتى. مەن وق بويى وزىق كەلدىم. الگى قاريا وتىز بەس سومدى ساناپ بەردى. ول كەزدە وتىز بەس سوم كوپ اقشا! ەرتەسىنە دە سولاي. كۇنىنە ەرتىسكە بارىپ, شومىلىپ, سۋعا جۇزۋدەن جارىسقا قاتىناسامىن. قاتىناسقان سايىن ءبىرىنشى ورىندى جەڭىپ الامىن. قالتاما كۇنىنە وتىز بەس سوم تۇسەدى.
ءبىر كۇنى الگى قاريا مەنەن «قاي جەردەنسىڭ؟» دەپ سۇرادى. «تالاستانمىن», دەدىم.
سىناق ەمتيحاندارىنان دا قىسىلا-قىمتىرىلا ءوتتىم. وقۋعا ءتۇسىپ ۇيگە كەلسەم, ماعان اكەم سەنبەيدى. مال باققىزىپ قويدى. ينستيتۋتتان وقۋعا شاقىرۋ قاعازى كەلگەندە بارىپ, ءبىر-اق سەندى».
جاقسىلىق سۋدىڭ استىندا دەم الماي ءۇش مينۋت ەلۋ سەگىز سەكۋند جاتا الادى ەكەن. بۇل ەكى سەكۋندتى ەسەپتەمەگەندە باقانداي ءتورت مينۋت قوي! كەرەمەت ەمەس پە؟! تىنىس الۋ جۇيەسى, وكپەسى ەرەكشە جاراتىلعان دەسە دە بولادى. كاسىپقوي سۋعا جۇزۋشىلەردىڭ كەز كەلگەنى ولاي سۋ استىندا جاتا المايدى. ماسكەۋدە وليمپياداعا دايىندالعاندا سەرىك قوناقباەۆ بارلىعىمىز باسسەينگە تۇسەمىز. سوندا ولار تاڭ قالاتىن. كەيدە قىزىعا دا قارايتىنداي كورىنەتىن ماعان, دەدى.
مەن ءوزىم سۋدىڭ استىندا 45 سەكۋند ارەڭ جاتا الامىن. ال, 4 مينۋت دەم الماي جاتۋ دەگەن شىنىندا دا عاجاپ!
جاكەڭنىڭ كوڭىلى ءالى دە دارحان. جەرگىلىكتى حالىققا قارايلاسىپ, اندا-ساندا قايىرىمدىلىق تا كورسەتىپ وتىرادى. «اۋىل دەگەن التىن بەسىك قوي. ەڭبەك ەتەمىن دەگەن ادامعا جۇمىس تابىلادى» دەدى ول بىردە اعىنان جارىلىپ...
مارات قاشقىنباەۆ.
الماتى وبلىسى,
بالقاش اۋدانى,
باقاناس سەلوسى.