قازاقستاندىق مامان اندرەي كارپوۆيچ فۋتبولدان قازاقستان چەمپيوناتىنىڭ پرەمەر-ليگاسىندا ونەر كورسەتەتىن «قىزىلجار» كلۋبىنىڭ باس باپكەرى قىزمەتىنەن كەتتى, دەپ حابارلايدى Egemen.kz.
ا.كارپوۆيچتىڭ ينستاگرامداعى پاراقشاسىندا ءمالىم ەتكەنىندەي, بۇل شەشىمدى ول ءوز ەركىمەن قابىلداعان.
«وتكەن جىلعى ماۋسىم ءبىز ءۇشىن تاماشا ءارى قىزىقتى بولدى. ءبىز قازاقستان اتىنان كونفەرەنتسيا ليگاسىندا ونەر كورسەتۋگە جولداما الدىق. جىگىتتەرىمىز ەل نامىسىن ابىرويمەن قورعايدى دەپ ۇمىتتەنەمىن جانە سەنەمىن. بۇل – جاقسى دا مىقتى كوماندا, تەك ساتتىلىك كەرەك. مۇمكىن, مەنىڭ كەتۋىم «قىزىلجارعا» ساتتىلىك اكەلەتىن شىعار. بۇل تەك مەنىڭ شەشىمىم ەكەندىگىنە تاعى دا نازار اۋدارعىم كەلەدى. كلۋب باسشىلىعىمەن ءبىز دوس بولىپ قالامىز. وسى كەزەڭدە قولداۋ كورسەتكەن باسشىلىققا, اكىمدىككە, ويىنشىلار مەن قىزمەتكەرلەرگە, باپكەرلەر مەن جانكۇيەرلەرگە ريزاشىلىعىمدى بىلدىرەمىن. مەن قاشاندا «قىزىلجارعا» جانكۇيەرمىن. بارىنە ۇلكەن راحمەت!», دەپ جازدى ا.كارپوۆيچ.
«قىزىلجار» ەل بىرىنشىلىگىندە سەگىز تۋردان كەيىن 13-ورىندا كەلەدى. وتكەن ايدا ا.كارپوۆيچتىڭ ەكى ماتچتا قازاقستان ۇلتتىق قۇراماسىن دا جاتتىقتىرعانى بەلگىلى.
ايانا توعانبەك