بەرلين قالاسىندا مادەني ىنتىماقتاستىق جونىندەگى قازاقستان-گەرمانيا ۇكىمەتارالىق كوميسسياسىنىڭ كەزەكتى ءتورتىنشى ءماجىلىسى بولىپ ءوتتى. قازاقستان دەلەگاتسياسىن مادەنيەت مينيسترلىگى مادەنيەت كوميتەتىنىڭ توراعاسى تىلەۋعالي قىشقاشباەۆ, گەرمانيا دەلەگاتسياسىن فەدەرالدىق سىرتقى ىستەر مينيسترلىگى مادەنيەت جانە بايلانىس دەپارتامەنتى ديرەكتورىنىڭ ورىنباسارى, ەلشى اندەرس مايتتسنەر باسقاردى.
ءماجىلىستىڭ كۇن تارتىبىندە مادەنيەت, ونەر, كينەماتوگرافيا, سپورت جانە ءبىلىم سالاسىنداعى كەڭەيتۋ, اكادەميالىق جانە عىلىمي تاجىريبە الماسۋدى جانداندىرۋ, سونىمەن قاتار, اقپارات, باسپا جانە مۇراعاتتىق ىستەر سالاسىنداعى قارىم-قاتىناس تۋرالى ماسەلەلەر قارالدى. رەسەيمەن, ورتالىق ازيامەن جانە «شىعىس ارىپتەستىك» ەلدەرىمەن ىنتىماقتاستىق بويىنشا گفر ۇكىمەتىنىڭ وكىلى گەرنوت ەرلەر اتالعان ءماجىلىس ەكىجاقتى قارىم-قاتىناس, ساياسي ۇنقاتىسۋ مەن ەكى ەلدىڭ اراسىنداعى ەكونوميكالىق قاتىناستاردىڭ دامۋ دەڭگەيىنىڭ بەينەسى دەپ اتاپ ءوتتى.
ءوز كەزەگىندە ت.قىشقاشباەۆ مادەنيەت پەن ءبىلىمنىڭ نەمىس تاراپىمەن بايلانىسى ماڭىزدى ەكەنىن, قازاقستان باسشىسىنىڭ جولداۋىمەن ۇيلەسەتىنىن اتاپ ءوتتى. قازاقستان دەلەگاتسياسى باسشىسىنىڭ سوزىنە قاراعاندا, قازاق ءتىلىنىڭ گەرمانيادا جانە نەمىس ءتىلىنىڭ قازاقستاندا بەرىلۋىنە ەكىجاقتى كەلىسىممەن رۇقسات ەتىلگەن.
شارانىڭ قورىتىندىسى بويىنشا ناقتى ۋاعدالاستىقتارعا قول جەتكىزىلىپ, وتىرىستىڭ قورىتىندى حاتتاماسىنا قول قويىلدى. بۇلار كەلەر جىلدارداعى قارىم-قاتىناستىڭ نەگىزگى باعىتتارىن قامتيدى.
مادەني ىنتىماقتاستىق ءجونىندەگى قازاقستان-گەرمانيا ۇكىمەتارالىق كوميسسياسى 1994 جىلعى 16 جەلتوقسان «گەرمانيا فەدەراتيۆتىك رەسپۋبليكاسى مەن قازاقستان رەسپۋبليكاسىنىڭ ۇكىمەتتەرى اراسىنداعى مادەني بايلانىستار» تۋرالى كەلىسىم نەگىزىندە قۇرىلعان بولاتىن.
«ەگەمەن-اقپارات».