اتىراۋداعى مەكتەپ دارەتحاناسىندا 11-سىنىپ وقۋشىسى سوققىعا جىعىلدى. الدىن الا اقپارات بويىنشا, وقۋشىعا دارىگەرلەر جاق سۇيەگىنىڭ سىنۋى دياگنوزىن قويعان, دەپ حابارلايدى Egemen.kz.
«موي گورود» باسىلىمىنىڭ مالىمەتىنشە, وقىس وقيعا 25 ساۋىردە №36 مەكتەپ-گيمنازيادا ورىن العان.
قالالىق ءبىلىم ءبولىمىنىڭ باسشىسى فەرۋزا شاڭگەرەەۆا بۇل كۇنى 10-شى جانە 11-سىنىپتىڭ ەكى وقۋشىسى اراسىندا دۇردارازدىق تۋىنداپ, مەكتەپ دارەتحاناسىندا جالعاسقانىن ايتادى. 10-سىنىپتىڭ وقۋشىسى ەكىنشىسىن ۇرىپ جاتقاندا ولاردىڭ جانىندا 9 جانە 11 سىنىپتاردىڭ التى وقۋشىسى بولعان.
«مەكتەپ مەدبيكەسى بالاعا مەديتسينالىق كومەك كورسەتتى, قازىر ول دارىگەرلەردىڭ باقىلاۋىندا. توبەلەسكە قاتىسۋشىلاردىڭ بارلىعىمەن جانە ولاردىڭ اتا-انالارىمەن ءتۇسىندىرۋ جۇمىستارى جۇرگىزىلدى. وقۋ ورنىنىڭ ديرەكتورى جاۋاپكەرشىلىككە تارتىلدى. بولاشاقتا بۇل مەكتەپتىڭ تاربيە پروتسەسى قاتاڭ باقىلاۋدا بولادى», دەيدى فەرۋزا شاڭگەرەەۆا.
وبلىستىق بالالار اۋرۋحاناسىنىڭ ديرەكتورى نۇرقابىل ايتمۇحامبەتوۆ 25 ساۋىردە ساعات 17:30-دا مەديتسينالىق مەكەمەنىڭ قابىلداۋ بولىمىنە جاراقاتى بار ناۋقاس كەلىپ تۇسكەنىن حابارلادى. ول وتولارينگولوگيا بولىمىنە جاتقىزىلعان.
«ناۋقاسقا مەديتسينالىق كومەك كورسەتىلدى. الايدا وعان شۇعىل وتا قاجەت بولماعاندىقتان جانە وبلىستا جاق-بەت حيرۋرگىنىڭ جوقتىعىنان ناۋقاستى بقو ماماندارىنا جىبەرۋ تۋرالى شەشىم قابىلداندى. وعان 7-10 كۇن ىشىندە جوسپارلى وتا جاسالۋ كەرەك بولاتىن. الايدا ناۋقاستىڭ اتا-اناسى قولحات بەرىپ, ءوز ەركىمەن بوساتىپ الىپ, ونى بقو-عا الىپ كەتتى», دەيدى نۇرقابىل ايتمۇحامبەتوۆ.