25 ساۋىردە الماتى قالاسىندا, اقپارات جانە قوعامدىق دامۋ ءمينيسترى اسقار وماروۆتىڭ رەسپۋبليكالىق ەتنومادەني بىرلەستىكتەردىڭ وكىلدەرىمەن كەزدەستى, دەپ حابارلايدى Egemen.kz.
ءىس-شاراعا قازاقستان حالقى اسسامبلەياسىنىڭ مۇشەلەرى, رەسپۋبليكالىق ەتنومادەني بىرلەستىكتەردىڭ باسشىلارى, ەتنو بۇقارالىق اقپارات قۇرالدارىنىڭ باس رەداكتورلارى جانە بەلسەندى جاستار قاتىستى.
كەزدەسۋ بارىسىندا ەتنوسارالىق قاتىناستار سالاسىندا مەملەكەتتىك ساياساتتى ءتيىمدى جۇزەگە اسىرۋ مەن قازاقستان حالقى اسسامبلەياسىنىڭ قىزمەتىن جاڭعىرتۋ ماسەلەلەرى تالقىلاندى.
مينيستر ءوز سوزىندە اتالعان جۇمىستار مەملەكەت باسشىسىنىڭ جولداۋىن جۇزەگە اسىرۋ اياسىندا اتقارىلاتىنىن جانە اتالعان قۇجاتتا بىرقاتار ساياسي وزگەرىس كورىنىس تاپقانىن جەتكىزدى.
«ساياسي وزگەرىستەر مەملەكەتتى باسقارۋ پروتسەسىنە ازاماتتاردى كەڭىنەن تارتۋدى قامتاماسىز ەتۋگە باعىتتالعان. بۇل ءوز كەزەگىندە, قۋاتتى پارلامەنتتىك مادەنيەتى مەن ىقپالدى حالىق قالاۋلىلارى بار جاڭا قازاقستاننىڭ نەگىزى بولماق. سونىمەن قاتار پارتيالىق جۇيە ءۇشىن مۇمكىندىكتەر كەڭەيتىلەدى, سايلاۋ زاڭناماسى جەتىلدىرىلىپ, ازاماتتىق قوعام ينستيتۋتتارى مەن باق ءرولى ارتا تۇسەدى», دەدى مينيستر.
بۇعان قوسا اسقار وماروۆ قوعاممەن بايلانىستى ارتتىرۋدىڭ ماڭىزدىلىعىن ايتا كەلە «ۇلتتىق قۇرىلتايدىڭ» وزەكتىلىگىنە توقتالدى.
«بۇل ازاماتتىق ينستيتۋت ۇلتتىق قوعامدىق كەڭەستى الماستىرىپ, ونىڭ قۇرامىنا بەلدى دە بەلگىلى قوعام قايراتكەرلەرى, قوعامدىق ۇيىمداردىڭ جەتەكشىلەرى مەن بارلىق وڭىرلەردىڭ وكىلدەرى كىرەتىن بولادى. ازاماتتىق قوعاممەن بايلانىس ءبىزدىڭ مەكەمەنىڭ قۇزىرەتىنە كىرەتىندىكتەن «ۇلتتىق قۇرىلتايدىڭ» باسىم بولىگىن ءبىزدىڭ ارىپتەستەرىمىز, سونداي-اق وسى زالدا وتىرعاندار دا قۇرايتىن بولادى», دەپ مالىمدەدى ا.وماروۆ.
قورىتىندىلاي كەلە, مينيستر مەملەكەت پەن قوعامنىڭ ودان ءارى دامۋى ءۇشىن اتالعان ابىرويلى قىزمەت ءوز جالعاسىن تاباتىنىن, اقپارات جانە قوعامدىق دامۋ مينيسترلىگى وسى باعىتتاعى جۇمىستى بىرلەسىپ ۇيلەستىرۋگە دايىن ەكەندىگىن جەتكىزىپ, بارلىق قاتىسۋشىلاردى الداعى قازاقستان حالقىنىڭ بىرلىگى كۇنىمەن قۇتتىقتادى.