بۇل تۋرالى بۇگىن ۇكىمەت وتىرىسىندا ەنەرگەتيكا ءمينيسترى بولات اقشولاقوۆ ايتتى, دەپ حابارلايدى Egemen.kz.
«جەر قويناۋىن پايدالانۋ سالاسىندا 2021 جىلدىڭ قورىتىندىسى بويىنشا ەنەرگەتيكا سەكتورىنداعى جەر قويناۋىن پايدالانۋشىلاردىڭ تاۋارلارىن, جۇمىستارى مەن كورسەتىلەتىن قىزمەتتەرىن ساتىپ الۋدىڭ جالپى كولەمى 4,69 ترلن تەڭگەنى قۇرادى. جەرگىلىكتى قامتۋ ۇلەسىنىڭ ورتاشا سالالىق كورسەتكىشى 2,9 ترلن تەڭگە سوماسىنا 61,8 پايىز بولدى. ونىڭ ىشىندە: تاۋارلار - 24,3, جۇمىستار - 76,4, كورسەتىلەتىن قىزمەتتەر - 53,6 پايىز. جالپى, ساتىپ الۋ كولەمىنىڭ شامامەن 75 پايىزى 3 ءىرى وپەراتورعا – تەڭىزشەۆرويل, قاراشىعاناق پەترولەۋم وپەرەيتينگ جانە نورت كاسپيان وپەرەيتينگكە, 13 پايىزى «سامۇرىق-قازىنا» قورىنىڭ كومپانيالار توبىنا جانە 12 پايىزى قالعان جەر قويناۋىن پايدالانۋشىلارعا تيەسىلى», دەدى مينيستر.
وسى رەتتە بولات اقشولاقوۆ تاۋارلارداعى جەرگىلىكتى قامتۋ ۇلەسىن ۇلعايتۋعا مۇمكىندىكتەر بار ەكەنىن, ول ءۇشىن مينيسترلىك ەكى باستامانى ىسكە اسىرعانىن ايتتى.
ء«بىرىنشى, «شەۆرون» كومپانياسى ءوزىنىڭ رەسپۋبليكا الدىنداعى قايتا ينۆەستيتسيالاۋ مىندەتتەمەلەرى اياسىندا قازاقستاننىڭ كىرىستى كاسىپورىندارىنا 248,5 ملن اقش دوللارىن ءبولۋدى قاراستىرىپ وتىر. ەكىنشى, «مۇناي-گاز ماشيناسىن جاساۋدى دامىتۋدىڭ حالىقارالىق ورتالىعى» قۇرىلدى. ول 3 ءىرى وپەراتوردىڭ مۇقتاجدىعى ءۇشىن جەرگىلىكتى تاۋارلاردى دامىتۋ بويىنشا جۇمىس جۇرگىزۋدە. بۇگىنگى تاڭدا ورتالىق ءۇش تاۋار توبى: تيەك ارماتۋراسى, باقىلاۋ-ولشەۋ اسپاپتارى مەن اۆتوماتيكا جانە ەلەكتر-تەحنيكالىق جابدىق بويىنشا ءوندىرىستى وقشاۋلاۋ بويىنشا جۇمىستاردى باستادى. تاياۋداعى 10 جىلدا وسى تاۋار توپتارى قاجەتتىلىگىنىڭ جالپى سوماسى 400 ملن اقش دوللارىن قۇرايتىن بولادى», دەدى ول.
ءمينيستردىڭ دەرەگىنشە, ورتالىق وسى تاۋار توپتارىنا مامانداندىرىلعان ەلىمىزدىڭ 13 وڭىرىندەگى 60 زاۋىتتى ارالاپ, 35 مىڭنان استام تاۋاردى تالداعان. ونىڭ ىشىندە 19 تاۋار ءتۇرى جاقىن بولاشاقتا وپەراتورلار نەعۇرلىم تالاپ ەتەتىن تاۋارلار رەتىندە ايقىندالدى.
«2022 جىلدىڭ ءبىرىنشى جارتىجىلدىعىنىڭ سوڭىنا دەيىن وپەراتورلار 9 كەلىسىمشارت بەرۋىن كوزدەيتىن جول كارتاسى بەكىتىلدى. بۇگىنگى تاڭدا 4 وندىرۋشىمەن كەلىسىمدەر جاسالىپ, ولار قازاقستاندىق سەرىكتەستەرمەن جوبالاردى ىسكە اسىرۋدى باستادى. بۇل Honeywell – گاز دەتەكتورلارىن, تەمپەراتۋرا تۇرلەندىرگىشتەرىن جانە باسقارۋ جۇيەلەرىنىڭ شكافتارىن ءوندىرۋ, Petrol Valves - بەكىتۋ ارماتۋراسىن ءوندىرۋ, Sigma Solutions - ەلەكتر تاراتۋ قوراپتارىنىڭ جاڭا ءوندىرىسى جانە ەلەكتر جىلىتۋ جۇيەلەرىنىڭ ءوندىرىسى جانە Elektro Serve - سورعىلار, ازوت گەنەراتورلارى جانە ەلەكترلىك اينالمالى ماشينالار ءوندىرىسى. اتالعان جوبالاردان كۇتىلەتىن ناتيجە - شامامەن 4,9 ملرد تەڭگە ينۆەستيتسيا تارتۋ جانە 300 جاڭا جۇمىس ورنىن قۇرۋ. سونىمەن قاتار, ورتالىق قازىرگى ۋاقىتتا وپەراتورلارمەن بىرگە وقشاۋلاۋعا ارنالعان كەلەسى تاۋارلىق توپتاردى انىقتادى: تەحنولوگيالىق سۇزگىلەر, سورعىلار مەن تىعىزداعىشتار, قۇبىر ونىمدەرى, جىلۋ, جەلدەتۋ جانە اۋانى باپتاۋ جۇيەسى. 37 وتاندىق تاۋار ءوندىرۋشى قازىردىڭ وزىندە ولاردى وقشاۋلاۋعا مۇددەلىگىن ءبىلدىردى», دەدى مينيستر.