اتىراۋدا قازاقتىڭ تۇڭعىش ۇشقىش قىزى, حالىق قاھارمانى حيۋاز دوسپانوۆا اتىنداعى ارناۋلى ستيپەنديانىڭ العاشقى يەگەرى انىقتالدى. بۇل تۋرالى وبلىستىق ارداگەرلەر كەڭەسىنىڭ توراعاسى قاتيموللا ريزۋانوۆ حابارلادى.
ەكىنشى دۇنيەجۇزىلىك سوعىستا اۋەگە 300 رەت كوتەرىلىپ, جاۋعا قارسى ۇرىستا ەرەن ەرلىكتىڭ ۇلگىسىن كورسەتكەن قازاقتىڭ باتىر قىزى حيۋاز دوسپانوۆانىڭ ەسىمىن ەستە قالدىرۋ ماقساتىندا قولعا الىنعان يگىلىكتى شاراعا وبلىستىق ارداگەرلەر كەڭەسى ۇيىتقى بولىپ وتىر. «ءبىز بۇل ماسەلەنى بىلتىردان بەرى ويلاستىرىپ, دەمەۋشىلەر ىزدەستىرە باستاعانبىز. جاقىندا دەمەۋشىلەرمەن كەڭەسىپ, حيۋاز دوسپانوۆا اتىنداعى ارناۋلى ستيپەنديانى تاعايىنداۋدى ۇيعاردىق. ارنايى قۇرىلعان كوميسسيانىڭ تالقىلاۋىنان كەيىن باتىر اتىنداعى ارناۋلى ستيپەنديانىڭ العاشقى يەگەرىن انىقتادىق»,- دەدى قاتيموللا ريزۋانوۆ.
حالىق قاھارمانى حيۋاز دوسپانوۆا اتىنداعى ارناۋلى ستيپەنديا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ستۋدەنتى گۇلناز جولبولدىقىزىنا بەرىلدى. ءبىر ەرەكشەلىگى, اسكەري ۇشقىش اتىنداعى ستيپەندياعا يە بولعان ستۋدەنت اتالعان ۋنيۆەرسيتەتتە «العاشقى اسكەري دايىندىق» ماماندىعىندا وقيدى. وعان وبلىستىق ارداگەرلەر كەڭەسىنىڭ توراعاسى ق.ريزۋانوۆ ارنايى سەرتيفيكات پەن ستيپەنديانى تاپسىردى.
جولداسبەك شوپەعۇل.
اتىراۋ وبلىسى.
دەرەككوز: ق. ريزۋانوۆ.
فوتو: اۆتور.