تىلشىلەر قوسىنىنا وبلىستىق اكىمدىكتىڭ ءباسپاسوز قىزمەتىنەن تەلەفون شالىنىپ, وسىندا قىزمەت جاسايتىن باس مامان لاڭكەستىك پەن ءدىني ەكسترەميزمگە قارسى كۇرەس كوميسسياسىنىڭ وتىرىسىنا قاتىسۋىمىزدى ءوتىندى. باردىق, قاتىستىق. مۇندا لاڭكەستىك پەن ەكسترەميزمگە قارسى وڭ قوعامدىق سانا قالىپتاستىرۋ – بۇل باعىتتا وڭىرلىك بۇقارالىق اقپارات قۇرالدارىنىڭ ءرولى جونىندە باتىس قازاقستان وبلىستىق ىشكى ساياسات باسقارماسىنىڭ باسشىسى ايگۇل ەسەكەنوۆا جانە ءدىني ەكسترەميزمنىڭ الدىن الۋ جونىندە باتىس قازاقستان وبلىستىق ءدىن ىستەرى باسقارماسىنىڭ باسشىسى تالعات نىعمەتوۆتەر قاعازدان باس الماي قۇر, جالاڭ دەرەكتەردى تىزبەلەپ بەردى.
مۇنىڭ ەكەۋى دە قاپەلىمدە ءىشىن وڭايلىقپەن الدىرا قويمايتىن, ەكىنىڭ ءبىرىنىڭ ءتىسى باتا بەرمەيتىن كۇردەلى ماسەلە دەۋگە بولادى. سوندىقتان دا بۇل ارادا پالەنباي ادامدى قامتىعان پالەنباي شارا وتكىزىلدى. مىناداي ءىس-شارالار جوسپارى جاسالدى. وسىنشاما اقپارات – ناسيحات توپتارى قۇرىلدى دەپ قولدا بار دەرەكتەردى تالعامسىز تۇردە تىزبەلەي بەرۋدىڭ قاجەتى شامالى بولسا كەرەك. ارينە, ونىڭ ءبارىنىڭ قاجەتتىلىگىن جوققا شىعارۋعا بولمايدى. باستى ماسەلە ءتيىستى تالداۋلار مەن ساراپتامالار جانە سالىستىرۋلار جاساي وتىرىپ, اتالعان شارالاردىڭ قانداي ىقپالى بولعانىنا وي جۇگىرتۋدە ەمەس پە؟!
ايتسە دە, جوعارىدا اتالعان باسشىلاردىڭ الدىن الا جازىلىپ الىنعان دەرەكتەردى قاعازدان باس الماي, سارتىلداتىپ وقىپ بەرۋدەن ءارى اسا الماي جۇرگەندەرى دە باتىسقازاقستاندىقتارعا جاقسى بەلگىلى. بۇل جولى دا سولاي بولدى. سوندىقتان دا ونى وتىرىسقا قاتىسقاندار وتە سەلسوق تىڭدادى. ال «تىڭدالماسا ءسوز جەتىم ەمەس پە؟». ءبىزدىڭ ويىمىزشا قاعازدان باس الماۋ, تىپتى وعان جابىسىپ ايىرىلماۋ – باسشىنىڭ تەرەڭ زەردەلىلىگىن, ونىڭ وي-ءورىسىنىڭ بيىكتىگى مەن كەڭدىگىن تانىتا المايدى.
بۇگىندە رەسپۋبليكا وبلىستارىنداعى ىشكى ساياسات پەن ءدىن ىستەرى جونىندەگى جەرگىلىكتى ۆەدومستۆولارعا جۇكتەلىپ وتىرعان جاۋاپكەرشىلىك وتە جوعارى. اتالعان قۇرىلىمداردىڭ قىزمەتىنىڭ جۇيەلى ءارى ناتيجەلى بولۋى كوپ جاعدايلاردا يىرىمدەرى مەن قيا-قالتارىستارى كوپ وسى سالالاردىڭ باسى-قاسىندا جۇرگەن جەتەكشىلەردىڭ ساراپتامالىق قارىم-قابىلەتىنىڭ دەڭگەيى مەن تانىم-تۇسىنىگىنە, قوعامدا ءارتۇرلى وي-پىكىرلەر تۋعىزىپ جۇرگەن لاڭكەستىك پەن ءدىني احۋال توڭىرەگىندە بەلگىلى ءبىر قۇبىلىستىڭ وڭ نەمەسە تەرىس جاقتارىنا ادامداردىڭ كوزدەرىن جەتكىزە بىلۋلەرىنە بايلانىستى. وسى ارادا جەرگىلىكتى جەتەكشىلەردىڭ الدىن الا قاعازعا تۇسىرىلگەن دەرەكتەر توڭىرەگىنەن اسا الماي, ادامدارمەن تىكەلەي ءارى اشىق ءۇن قاتىسۋعا كەلۋدەن كەي جاعدايلاردا بوي تاسالاپ جۇرەتىنى دە ولاردىڭ قىزمەتىنىڭ تيىمدىلىگى مەن پارمەندىلىگىن كوتەرە المايدى دەر ەدىك.
ءيا, بىلىكتىلىك تالاپتارى مەن كورىنىستەرى جەرگىلىكتى باسشىلاردىڭ وزىنەن باستالعانىنا نە جەتسىن! تەك سوندا عانا ولار ءوز قاراۋىنداعى ماماندارعا وڭ جول مەن ونەگە كورسەتە الارى انىق. الايدا, ولاردىڭ تاپتاۋرىندىلىق پەن بىرسارىندىلىقتان جانە قاعازدىڭ كومەگىنەن ارىگە اسا الماي كەلە جاتقانى قىنجىلتپاي قويمايدى. البەتتە جۇرەكتەن شىقپاسا, جۇرەكتەرگە جەتپەيدى ەمەس پە؟!
تەمىر قۇسايىن.
باتىس قازاقستان وبلىسى.
فوتو: Yvision.kz.