وتكەن جىلى تۋعانىنا سەكسەن بەس جىل تولعان قازاق بالالار ادەبيەتىنىڭ كورنەكتى وكىلىنىڭ ءبىرى, بىرنەشە كىتاپتىڭ (ىشىندە نەمىس, ورىس تىلدەرىندە شىققان تۋىندىلارى مەن ءوزىنىڭ ەرتەگىلەرى دە بار) اۆتورى, جامبىلدىڭ ادەبي-مەموريالدىق مۋزەيىن ۇزاق ۋاقىت باسقارعان مارقۇم مۇحامەتجان ەتەكباەۆ ەلگە بەلگىلى شىعارماشىلىعىمەن قاتار, ناعىز قوناقجاي ادام ەدى.
ول ءوزىنىڭ تۋعان جەرى – جامبىل اۋدانى قاراقىستاق اۋىلىنداعى قاراشاڭىراعىندا تالاي قالامگەردى, ونەر ادامدارىن سىيلاپ كۇتىپ, مەيماندوستىق اق پەيىلىن تانىتقان جايدارى جان بولاتىن.
ال ەندى مۇحامەتجان اعانىڭ جان جارى, قازاقتىڭ اتاقتى, ايبىندى بايى مەدەۋ پۇسىرمانوۆتىڭ ۇرپاعى بولىپ كەلەتىن قازىر كوزى ءتىرى حازيما ايداربەكوۆا اجەمىز بەرگەن مىنا سۋرەتتىڭ جاي- جاعدايىنا كەلەيىك.
وتكەن عاسىرداعى 1970 جىلدىڭ كوكتەمىنىڭ ورتا تۇسىندا مۇقاڭ قازاقتىڭ ەكى قالامگەرى – قابدەش ءجۇمادىلوۆ پەن ساۋىربەك باقبەرگەنوۆتى قۇشاق جايا قارسى الادى.الدىمەن ارينە, ءوزى جەتەكشىلىك ەتەتىن جامبىل مۋزەيىنە اپارىپ, اسىقپاي ابدەن ارالاتادى. سوناڭ سوڭ ۇشەۋى قاراقىستاق اۋىلى تۇسىنداعى اسقاق الاتاۋ بوكتەرىنە كوتەرىلىپ, «كوڭىل قۇسىن كوككە ۇشىرعان» عوي.
ءدال وسى جەردە قازاق ادەبيەتىنىڭ بولاشاق كلاسسيگى قابدەش ءجۇمادىلوۆ پەن ويلى وچەركتەرى مەن تالاي تاماشا رومان-پوۆەستەرىمەن تانىلعان مايدانگەر قالامگەر ساۋىربەك باقبەرگەنوۆ ۇشەۋى الاتاۋ باۋرايىندا ەسكەرتكىش ءۇشىن سۋرەتكە ءتۇسىپتى.
سول جاقتان باستاساق, الدىمەن مۇحامەتجان, ودان كەيىن تارتىمدى تۋىندىلارىمەن بىرگە بۋرىل شاشىمەن, قويۋ مۇرتىمەن ءسانى كەلىسكەن ساۋىربەك اتا جانە قالامگەرلىك ەرەن ەڭبەگىمەن قازاق ۇلتى ءۇشىن بەلى قايىسقان قابدەش اعا.
بەرىكباي قادىقوۆ,
جۋرناليست
الماتى وبلىسى,
قاراساي اۋدانى