ۋكراينانىڭ وڭتۇستىگى مەن شىعىسىندا سوعىس جالعاسىپ جاتىر. سوڭعى بىرنەشە كۇندە رەسەي تاراپى راكەتالىق اتقىلاۋدى كۇشەيتە ءتۇستى. باتىس ەلدەرى ۋكرايناعا اۋىر تەحنيكا بەرۋگە كىرىستى. ساراپشىلاردىڭ ايتۋىنشا, الداعى ۋاقىتتا دونباستا شەشۋشى قاقتىعىس ءوتۋى مۇمكىن.
وتكەن بەيسەنبىدە رەسەيدىڭ سىرتقى ىستەر ءمينيسترى سەرگەي لاۆروۆ ۋكراينانىڭ شىعىسىنداعى «اسكەري وپەراتسيا» جاڭا كەزەڭگە وتكەنىن حابارلاعان ەدى. «باسىندا جاريالاعانىمىزداي, بۇل دونەتسك پەن لۋگانسك رەسپۋبليكالارىن تولىق ازات ەتۋگە باعىتتالعان. وپەراتسيا جالعاسادى. ونىڭ كەلەسى كەزەڭى باستالىپ جاتىر», دەدى س.لاۆروۆ.
كۇنى كەشە رەسەي قورعانىس ءمينيسترى سەرگەي شويگۋ رەسەي پرەزيدەنتى ۆلاديمير پۋتينگە ماريۋپول قالاسىن باسىپ العانى تۋرالى مالىمدەدى. ونىڭ ايتۋىنشا, قازىرگى تاڭدا «ازوۆستال» ونەركاسىپتىك ايماعىندا عانا ۋكراينا اسكەرى قالعان. س.شويگۋ ءوز سوزىندە زاۋىتتى باسىپ الۋ تۋرالى جوسپارىمەن بولىسكەن-ءدى. الايدا كرەمل باسشىسى «ازوۆستالعا» شابۋىل جاساۋ وپەراتسياسىنان باس تارتۋدى تاپسىردى. بۇل ۇيعارىمىن ۆ.پۋتين «رەسەي ساربازدارىنىڭ ءومىرىن ساقتاۋ قاجەت» دەپ ءتۇسىندىردى.
دەگەنمەن بۇعان دەيىن ۋكراينا پرەزيدەنتى ۆولوديمير زەلەنسكي ماريۋپولدى قورعاپ جاتقان جاۋىنگەرلەرگە قاتىستى پىكىرىن بىلدىرگەن ەدى. كيەۆ بيلىگى الدا-جالدا رەسەي اسكەرى «ازوۆستالعا» شابۋىل جاساپ, ونداعى ساربازدار مەن بەيبىت تۇرعىنداردى قىرسا, ەكى ەل اراسىنداعى كەلىسسوزدەر مۇلدەم توقتايتىنىن جەتكىزدى.
ەستەرىڭىزدە بولسا, رەسەي اسكەرى ماريۋپول قالاسىن ناۋرىزدىڭ باسىندا قورشاۋعا العان بولاتىن. سودان بەرى قالانى تولىقتاي باقىلاۋىنا الا الماي كەلەدى. قالاعا شابۋىل باستالعالى مىڭداعان ادام ۇدەرە كوشىپ, بوسىپ كەتتى. قازىرگى تاڭدا شاھاردا شامامەن 120 مىڭعا جۋىق بەيبىت تۇرعىن بار.
سوعىستى زەرتتەۋ جونىندەگى امەريكالىق اناليتيكالىق ينستيتۋت 20 ساۋىردەگى ۇرىس قيمىلدارىنىڭ بارىسىنا ساراپتاما جاساپ, كەسكىلەسكەن قاقتىعىس الداعى ۋاقىتتىڭ ەنشىسىندە ەكەنىن مالىمدەدى. ينستيتۋتتىڭ مالىمەتتەرىنە سۇيەنسەك, رەسەيلىك اسكەرلەر سارسەنبى كۇنى ۋكراينانىڭ شىعىسىندا ءسال عانا ىلگەرىلەپ, بىرنەشە اۋىلدى باسىپ العان. بىراق ءالى دە شەپتى بۇزىپ ءوتۋى بايقالمايدى.
«رەسەي اسكەرى ءىرى شابۋىلعا قاجەتتى لوگيستيكالىق جانە كوماندالىق ينفراقۇرىلىم سالىپ جاتىر. ولار ەشقانداي ۇلكەن جەتىستىككە قول جەتكىزگەن جوق. كوپتەگەن باعىتتا العا جىلجۋى بايقالمايدى. ءساتتى شابۋىل جاساۋ مۇمكىندىگى دە كورىنبەيدى», دەيدى ينستيتۋت ساراپشىلارى.
ۇلىبريتانيا پرەمەر- ءمينيسترى بوريس دجونسون جۋرناليستەرگە بەرگەن سۇحباتىندا ۆلاديمير پۋتينمەن كەلىسسوز جۇرگىزۋدىڭ ءمانى جوق ەكەنىن مالىمدەدى. ونىڭ ايتۋىنشا, پۋتينمەن سوعىستى توقتاتۋ تۋرالى پىكىر الماسۋ قولتىراۋىنمەن ساۋدالاسۋمەن بىردەي.
اقش پرەزيدەنتى دجو بايدەن جوعارى اسكەري باسشىلارىمەن كەزدەسۋىندە ۋكراينداردىڭ قابىلەتى مەن سوعىسقا دايىندىعى كۇتكەنىنەن دە اسىپ تۇسكەنىن جەتكىزدى.
«مەن ولاردىڭ كۇشتى جانە جاۋجۇرەك ەكەنىن بىلەتىنمىن. بىراق ۋكراين حالقى كۇتكەنىمنەن دە اسىپ ءتۇستى. ولاردىڭ قايسارلىعىنا تاڭعالدىم... كۇن سايىن قارۋ-جاراق پەن وق-دارىلەر جىبەرىلىپ جاتىر. دۇنيە جۇزىندەگى ەلدەرمەن وداقتاستارىمىز بەن سەرىكتەستىكتەرىمىزدىڭ قانشالىقتى ماڭىزدى ەكەنىن كورىپ وتىرمىز», دەدى د.بايدەن.
كەيىنگى بىرنەشە كۇندە رەسەي ساربازدارى ۋكراينانىڭ قالالارىن زىمىراندار مەن ارتيللەريا ارقىلى اتقىلاۋىن كۇشەيتتى. رەسەي قورعانىس مينيسترلىگىنىڭ حابارلاۋىنشا, ءبىر تۇندە 1001 اسكەري نىسانعا, ونىڭ ىشىندە 162 اتىس پوزيتسياسىنا سوققى بەرىلگەن. دەگەنمەن سناريادتار مەن زىمىراندار اسكەري نىسانعا ەمەس, تۇرعىن ۇيلەر مەن ازىق-ت ۇلىك قويمالارىنا تۇسكەنى الەۋمەتتىك جەلىلەردە جاريالانعان ۆيدەولاردان انىق كورىنەدى.
ۋكراينانىڭ ەكىنشى ۇلكەن قالاسى حاركوۆتىڭ مەرى شاھاردى ءۇستى-ۇستىنە بومبالاپ جاتقانىن جەتكىزگەن. حاركوۆ وبلىستىق مەملەكەتتىك اكىمشىلىگىنىڭ باسشىسى ولەگ سىناگۋبوۆتىڭ ايتۋىنشا, رەسەيلىك كۇشتەر حاركوۆ اۋداندارىن بىرنەشە قارۋ تۇرىمەن اتقىلاعان. سونىڭ سالدارىنان بەس بەيبىت تۇرعىن قازا تاپتى.
ۇلىبريتانيا, اقش, كانادا جانە فرانتسيانىڭ قارجى مينيسترلەرى سارسەنبى كۇنگى G20 وتىرىسىندا رەسەي وكىلدەرى ونلاين ءسوز سويلەۋگە كىرىسكەندە ورىندارىنان تۇرىپ كەتىپ, بايلانىسىن ءوشىرىپ تاستادى. ال G7 ەلدەرىنىڭ قارجى مينيسترلەرى ۋكرايناعا 24 ملرد دوللاردان اساتىن قارجىلىق قولداۋ كورسەتۋگە كەلىسىم بەردى.