قازاقستان رەسپۋبليكاسى قاۋىپسىزدىك كەڭەسى جانىنداعى ساراپشىلىق كەڭەستىڭ وتىرىسى ءوتتى, دەپ حابارلادى پرەزيدەنتتىڭ ءباسپاسوز قىزمەتى.
ساراپشىلىق كەڭەس وتىرىستارىن وتكىزۋ تاجىريبەسىندە ءپىكىرلەسۋ العاش رەت قازاقستاننىڭ جەتەكشى ۋنيۆەرسيتەتتەرىنىڭ, الماتى قالاسىنداعى زەرتتەۋ ينستيتۋتتارى مەن قورلاردىڭ ساراپشىلارىنىڭ, سونداي-اق, مەملەكەتتىك ورگاندار باسشىلارىنىڭ قاتىسۋىمەن بەينەكونفەرەنتسيا بايلانىسى ارقىلى ءوتتى.
كۇن تارتىبىندە ۇكىمەتتىك ەمەس ۇيىمداردىڭ, قورلار مەن زەرتتەۋ ورتالىقتارىنىڭ جۇمىسىنداعى جاڭا ۇردىستەر, سونىمەن قاتار, مەملەكەتتىك ورگانداردىڭ ۇلتتىق قاۋىپسىزدىك سالاسىنداعى بولجامدىق-تالدامالىق جۇمىستارىنىڭ ماسەلەلەرى قامتىلدى.
تالقىلاۋ بارىسىندا قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى ق.پ.قوجامجاروۆ ۇكىمەتتىك ەمەس ۇيىمداردىڭ ەلدىڭ الەۋمەتتىك-ەكونوميكالىق جانە قوعامدىق ومىرىندە الاتىن ماڭىزدى جاسامپازدىق رولىنە ەرەكشە توقتالدى.
ساراپشىلار قازاقستاننىڭ ۇكىمەتتىك ەمەس ۇيىمدار سالاسىن رەتتەيتىن زاڭناماسى تمد كەڭىستىگى بويىنشا مەيلىنشە ليبەرالدى سانالاتىنىن, ەل ۇكىمەتى ازاماتتىق باستامالاردى دامىتۋعا جان-جاقتى جاعداي جاساپ كەلە جاتقانىن اتاپ ءوتتى.
ق.قوجامجاروۆ ۇكىمەتتىك ەمەس ۇيىمدار قىزمەتىندەگى اسا تۇيتكىلدى ماسەلەلەرگە ەرەكشە نازار اۋدارا وتىرىپ, ولاردىڭ ەڭ ماڭىزدى ميسسياسى – قازاقستاننىڭ ورنىقتى ءارى تابىستى دامۋىنا ۇلەس قوسۋ ەكەنىن ايتتى. وسىعان وراي ول ۇلتتىق جانە حالىقارالىق ۇكىمەتتىك ەمەس ۇيىمداردى, قورلار مەن ينستيتۋتتاردى مەملەكەت پەن قوعام ءۇشىن ستراتەگيالىق ماڭىزى بار مىندەتتەردى ورىنداۋدا سىندارلى قارىم-قاتىناس ورناتۋعا شاقىردى.
پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى اۋمالى-توكپەلى حالىقارالىق جاعداي مەن ۇلتتىق قاۋىپسىزدىك الدىندا تۇرعان سىن-قاتەرلەر وتاندىق ساراپشىلار قاۋىمى مەن مەملەكەتتىڭ ءوزارا تىعىز قارىم-قاتىناس ورناتۋىن تالاپ ەتەتىنىن ايتتى.
وتىرىس قورىتىندىسى بويىنشا ساراپشىلىق كەڭەس ناقتى ۇسىنىمدار بەردى, ولار قاۋىپسىزدىك كەڭەسى مەن ونىڭ ۆەدومستۆوارالىق كوميسسيالارى جۇمىسى بارىسىندا پايدالانىلاتىن بولدى.