بۇگىن ۇكىمەت ۇيىندە پرەمەر-مينيستر ءاليحان سمايىلوۆ داعدارىسقا قارسى قوسىمشا شارالار جونىندە كەڭەس وتكىزدى, دەپ حابارلايدى Egemen.kz.
وتىرىس بارىسىندا ۇكىمەتتىڭ سىرتقى ەكونوميكالىق جانە گەوساياسي فاكتورلاردىڭ قازاقستاندىق وندىرۋشىلەرگە اسەرىن مۇقيات قاداعالاپ وتىرعانى اتاپ ءوتىلدى.
وتاندىق كومپانيالاردىڭ ودان ءارى دامۋى جانە اكىمشىلىك جۇكتەمەنى تومەندەتۋ ءۇشىن جاڭا قولداۋ شارالارىن ەنگىزۋ ۇسىنىلادى.
وسىلايشا مەملەكەتتىك ساتىپ الۋ اياسىندا ءوز مىندەتتەمەلەرىن ورىنداۋ كەزىندە فورس-ماجورلىق جاعدايلارعا (لوگيستيكالىق دالىزدەردىڭ جابىلۋى, جەتكىزىلىمدەردىڭ ۋاقىتىلى ورىندالماۋى جانە ت. ب.) تاپ بولعان كومپانيالاردى جوسىقسىز جەتكىزۋشىلەر تىزىلىمىنە ەنگىزبەۋ تەتىكتەرىن پىسىقتاۋ ۇسىنىلادى.
سونىمەن قاتار اۋىل شارۋاشىلىعى وندىرۋشىلەرىن قولداۋ ءۇشىن ساقتاندىرۋ سىياقىلارىن مەملەكەتتىك سۋبسيديالاۋ كولەمىن ۇلعايتۋ ۇسىنىلادى. سونداي-اق ەلىمىزدە شىعارىلاتىن اۋىل شارۋاشىلىعى تەحنيكاسىنىڭ جەڭىلدىكتى ليزينگىن كەڭەيتۋ تۋرالى ۇسىنىس قولداۋ تاپتى.
پرەمەر-مينيستر ۇسىنىستاردى قولداپ, ولاردى جۇزەگە اسىرۋ ماسەلەلەرىن پىسىقتاۋدى تاپسىردى.