قوستاناي-اۋليەكول-سۇرعان تاس جولىنداعى قايعىلى وقيعاعا قاتىستى سوتقا دەيىنگى تەرگەۋ امالدارى باستالدى, دەپ حابارلايدى Egemen.kz.
جول اپاتى تۋرالى اقپاراتتى قوستاناي وبلىسى پوليتسيا دەپارتامەنتىنىڭ باستىعى ەرلان وماربەكوۆ Facebook جەلىسىندەگى پاراقشاسىنا جاريالادى.
20 ءساۋىر كۇنى ساعات 22:25-تە اۋليەكول اۋدانىنىڭ پوليتسيا بولىمىنە قوستاناي-اۋليەكول-سۇرعان اۆتوجولىنىڭ 72-شاقىرىمىندا كولىك اپاتى بولعانى تۋرالى حابارلاما تۇسكەن.
رەسەيلىك تىركەۋدەگى «تويوتا ەستيما» كولىگىن تىزگىندەگەن جىتىقارالىق 26 جاستاعى جۇرگىزۋشى ەلورداعا باعىت العان. كەنەت ول رولگە يە بولا الماي, جولدىڭ قارسى بەتىندە كەلە جاتقان «كاماز»-دىڭ تىركەمەسىنە سوعىلعان. جۇك كولىگىنىڭ رولىندە قوستاناي قالاسىنىڭ 28 جاستاعى تۇرعىنى بولعان. اپات سالدارىنان «تويوتا ەستيما» جۇرگىزۋشىسى جانە ەكى جولاۋشى وقيعا ورنىندا قازا تاپتى. جەڭىل كولىكتىڭ تاعى ءبىر جولاۋشىسى اۋىر جارالانىپ, اۋليەكول اۋدانى اۋرۋحاناسىنا جەتكىزىلدى. قازىر جان ساقتاۋ بولىمىندە جاتىر.
«جول اپاتى بولعان جەرگە باردىم. قازىرگى ۋاقىتتا «ابايسىزدا ەكى جانە ودان دا كوپ ادامنىڭ ولىمىنە اكەپ سوققان جقە بۇزۋ» بابى بويىنشا سوتقا دەيىنگى تەرگەۋ اياسىندا اپاتتىڭ سەبەپتەرىن انىقتاپ جاتىرمىز. اپات سەبەپتەرىن انىقتاۋ ءۇشىن بارلىق قاجەتتى ساراپتاما تاعايىندالدى», دەپ جازدى ەرلان وماربەكوۆ.