بۇگىن, 9 ءساۋىر كۇنى فۋتبولدان قازاقستان پرەمەر-ليگاسى 5-تۋرىنىڭ ويىندارى وينالدى. بۇل تۋرالى egemen.kz ءتىلشىسى حابارلادى.
تارازدا جەرگىلىكتى كوماندا بۇعان دەيىنگى ءساتسىز ويىندارىنىڭ قارىمىن قايتارىپ, سەمەيدىڭ «سپارتاگىن» 2:0 ەتىپ ءسۇرىندىردى. گولداردى الاڭ يەلەرى ساپىنان سەرگەي سكورىح (60) پەن الەكسەي ششيوتكين (71) سوقتى. ءدال وسىنداي ەسەپ قاراعاندىدا دا تىركەلدى. كەنشىلەر قالاسىنىڭ كومانداسى «اتىراۋدى» ۇتتى. ال گولداردى ۇلان قونىسباەۆ (56) پەن اندرەي پورىۆاەۆ (89) ءوز ەسەپتەرىنە جازدى. مۇنداي ەسەپ پاۆلوداردا «ەرتىس» پەن «ورداباسى» (شىمكەنت) اراسىنداعى كەزدەسۋ سوڭىندا دا تابلودا جانىپ تۇردى. وندا دا الاڭ يەلەرىنىڭ دەسى باسىم بولدى. بۇل ولاردىڭ ساپىنداعى يگور ءبۋرزانوۆيچتىڭ 13 جانە 16-مينۋتتار قارسىلاستار قاقپاسىنا ەكى گول سوعۋى ارقىلى ورىندالدى.
قوستانايدا «توبىل» مەن قىزىلوردانىڭ «قايسارى» اراسىنداعى ماتچ كۇشتىنى انىقتاي المادى. مۇندا قوناقتار ءبىرىنشى بولىپ ەسەپ اشتى. ونى 28 مينۋتتا سەرگەي سترۋكوۆ جاسادى. توبىلدىقتار ونىڭ ەسەسىن 50-مينۋتتا عانا قايتاردى (توماس شيمكوۆيچ). تاعى ءبىر تەڭ ويىن الماتىدا «قايرات» پەن «استانا» اراسىنداعى ويىندا تىركەلدى. وندا قارسىلاستار ءبىر-بىرلەرىنىڭ قاقپالارى قۇلپىن اشا المادى. مۇنىڭ ەسەسىنە, «اقتوبە» ءوز الاڭىندا تالدىقورعاننىڭ «جەتىسۋىن» تىزە بۇكتىردى. گولدى 74-مينۋتتا ماركوس پيزەللي ءتۇسىردى.
دامير قوجامقۇل.
دەرەككوز: egemen.kz.
فوتو: spotrs.kz..