كەشە كەشىكىسىن, 8 ساۋىردە جەرگىلىكتى ۋاقىتپەن 18 ساعات 51 مينوتتە پوليتسيانىڭ كەزەكشى بولىمىنە اتىراۋداعى تەمىر جول ۆوكزالىنا جارىلعىش زات قويىلدى دەپ شالىنعان تەلەفون قوڭىراۋى جالعان بولىپ شىقتى. بۇل تۋرالى اتىراۋ وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى گۇلنازيرا مۇحتاروۆا حابارلادى.
سۋىت حابار تۇسىسىمەن جەدەل قىزمەت وكىلدەرى اياعىنان تىك تۇردى. تەمىر جول ۆوكزالىنىڭ عيماراتى قورشاۋعا الىنىپ, ودان 250 ادام قاۋىپسىز جەرگە شىعارىلدى. ارنايى ماماندار ۆوكزال عيماراتى مەن وعان تاياۋ ورنالاسقان وزگە دە عيماراتتاردى ءجىتى تەكسەرىپ, قولدان جاسالعان جارىلعىش زاتتىڭ جوق ەكەندىگىنە كوز جەتكىزدى. ال پوليتسيا قىزمەتكەرلەرى جالعان اقپارات بەرىپ, قوڭىراۋ شالعان ايەل ادامدى انىقتادى. تەلەفون قوڭىراۋى اتىراۋ قالاسىنداعى 157/11 جالپى رەجيمدەگى تۇزەتۋ مەكەمەسىندەگى تاكسوفوننان شالىنعان. جالعان اقپارات بەرۋشى وسى كولونيادا جازاسىنىن وتەۋشى بولىپ شىقتى. ول 1994 جىلى اقتوبە وبلىسىندا دۇنيەگە كەلگەن. بۇعان دەيىن قىلمىستىق كودەكستىڭ 242-بابىمەن (تەرروريزم اكتىسى تۋرالى كورىنەۋ جالعان حابارلاۋ) 3 جىلعا باس بوستاندىعىنان ايرىلعان.
قازىر جالعان اقپارات تاراتۋشى ءوزىنىڭ ايىبىن مويىنداپ وتىر. ەندى وعان قاتىستى اتالعان باپ بويىنشا قىلمىستىق ءىس قوزعاۋ ماسەلەسى شەشىلۋ ۇستىندە.
جولداسبەك شوپەعۇل.
اتىراۋ وبلىسى.
دەرەككوز: گ. مۇحتاروۆا.
فوتو: ر. قويلىباەۆ.