پرەمەر-مينيستر ءاليحان سمايىلوۆ جىل سوڭىنا دەيىن بيزنەستى باقىلاۋ جانە قاداعالاۋ پروتسەسىن اۆتوماتتاندىرۋدى تاپسىردى, دەپ حابارلايدى Egemen.kz.
«ۇلتتىق ەكونوميكا مينيسترلىگى «اتامەكەن» پالاتاسىمەن بىرگە شاعىن جانە ورتا كاسىپكەرلىكتى دامىتۋ تۇجىرىمداماسىن ساپالى ىسكە اسىرۋدى قامتاماسىز ەتسىن. كاسىپكەرلىك قىزمەتتى «تازا پاراقتان» رەتتەۋدىڭ جاڭا تاسىلدەرىن ىسكە اسىرۋ ءۇشىن سالالىق مەملەكەتتىك ورگاندار مەن وڭىرلەردىڭ اكىمدىكتەرى ءبىر اپتا مەرزىمدە ءبىرىنشى باسشىلاردىڭ جاۋاپتى ورىنباسارلارىن بەلگىلەسىن», دەدى ءا. سمايىلوۆ.
بۇل باعىتتاعى جۇمىس پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆقا جۇكتەلدى.
«مەملەكەت باسشىسى بيزنەس سۋبەكتىلەرىن مەملەكەتتىك باقىلاۋ مەن قاداعالاۋ جۇيەسىندە «ادامي فاكتورعا» جول بەرمەي, ونى تولىق اۆتوماتتاندىرۋدى بيىلعى جىلدىڭ سوڭىنا دەيىن اياقتاۋدى تاپسىردى. اتالعان جۇيەنى تەكسەرۋ ناتيجەسىندە 93 باقىلاۋ سالاسىنىڭ 24-ءى عانا, 18 قاداعالاۋ سالاسىنىڭ 2-ءى عانا اۆتوماتتاندىرىلعانى انىقتالدى. بۇل باعىتتاعى جۇمىستى كۇشەيتۋ كەرەك. ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن بىرگە 2 اپتا مەرزىمدە تاۋەكەلدەردى باسقارۋ جۇيەسىنىڭ نەگىزىندە بيزنەس سۋبەكتىلەرىن مەملەكەتتىك باقىلاۋ مەن قاداعالاۋ جۇيەسىن اۆتوماتتاندىرۋ جونىندەگى جول كارتاسىن ازىرلەپ, كەلىسىلگەن جوبانى پرەمەر-مينيستر كەڭسەسىنە ەنگىزسىن. تسيفرلىق دامۋ مينيسترلىگى اۆتوماتتاندىرۋ جۇمىستارىن باقىلاۋعا السىن», دەدى ۇكىمەت باسشىسى.