قىتايدىڭ جوعارى وقۋ ورنىن ەندى عانا تامامداعان قوس قانداسىمىز مۇحاممەد نۇحتارحان مەن قايىرىمبەك كاكىمنىڭ باستاماشى بولۋىمەن «ءاز بابا» ماركالى قازاقتىلدى سمارتفون جاسالىپ, قىتاي بازارىنا شىقتى, دەپ حابارلادى BAQ.KZ ءتىلشىسى.
«بۇرىننان بەرى جەكە سايتىمىزدا قازاقتىلدى اندرويد باعدارلامالارىن جاساپ جۇرگەن بىزدەر ءۇشىن «ءاز بابا» ماركالى قالتا تەلەفونىن جارىققا شىعارۋ اسا قيىنعا تۇسكەن جوق. جارىم جىلعا جۋىق ۋاقىت ىشىندە باعدارلامالارىن جاساپ, تەرميندەردى ءبىر ىزگە كەلتىرىپ, ەڭ العاشقى توتە جازۋلى سمارتفوندى دۇنيەگە اكەلىپ وتىرمىز», دەيدى شانشي پەداگوگيكا ۋنيۆەرسيتەتىن بيىل عانا بىتىرگەن مۇحاممەد نۇحتارحان.
قازاق ءتىلىن بىلەتىندەر عانا قولدانا الاتىن اتالمىش سمارتفوننىڭ باستى ەرەكشەلىگى – وندا ۇلتتىق ويىندار ورناتىلىپ, ءتول تاعامدارىمىزدى دايارلاۋ تاسىلدەرىن تەحنيكا تىلىندە تاماشا سويلەتە بىلگەندىگىندە. سونداي-اق, ەكى دوس ۇلت رۋحانياتىندا ورنى ەرەكشە قازاقشا كىتاپتار مەن ءدىني ساۋاتتىلىقتى دامىتۋعا ارنالعان ادەبيەتتەردىڭ ەلەكتروندى نۇسقالارىن دا تەلەفونعا ەنگىزگەن ەكەن.
جەكە سايتتارىنىڭ ءوزى «ءاز بابا» (www.azbaba.com) دەپ اتالاتىن باۋىرلارىمىزدان نەگە بۇل اتتى تاڭداعاندارىن سۇراپ بىلگەنىمىزدە, ولاردان: «اتام زاماننان ءاز بابالارىمىز بىلەكتىڭ كۇشىمەن, نايزانىڭ ۇشىمەن ات ۇستىندە ءجۇرىپ قارسى كەلگەن دۇشپاندى جويىپ, ەلدى, جەردى قورعادى. سول رۋحتى جالعاساق دەگەن نيەتپەن ات قۇلاعىندا ويناماساق تا, وسىناۋ تەحنيكا زامانىندا وزگەگە ەسەمىزدى جىبەرمەي كومپيۋتەر الەمىن مەڭگەرسەك دەدىك. سوندىقتان ەڭ الدىمەن «ءاز بابا» سايتىن قۇرىپ, اندرويدتىق جۇيەدەگى بارلىق باعدارلامالاردى قازاقشالاپ قانا قويماي, تىڭ دۇنيەلەر جاساۋعا كىرىسكەنبىز. سول جۇمىسىمىزدىڭ ارقاسىندا ءاز ناۋرىزدا «ءاز بابانى» بازارعا شىعاردىق», دەگەن مازمۇنداعى جاۋاپ الدىق.
ال, مۇحاممەدتىڭ ايتۋىنشا, «ءاز بابا» سايتىندا تەحنيكا ءتىلىن قازاقشا «سايراتۋدى» ماقسات تۇتقان ءبىر توپ قازاق جاستارى جۇمىس جاسايدى ەكەن. «جۇمىلا كوتەرگەن جۇك جەڭىل» دەگەندەيىن, جاڭا تەلەفوننىڭ جارىققا شىعۋىنا وسى دوستارىم كوپ ەڭبەك ءسىڭىردى. ولارعا ايتار العىسىمىز شەكسىز!», دەيدى ول.
ودان بولەك قازاقى ۇلگىدەگى فلەشكالار مەن بالالار ويىنشىعىن جاساپ شىعارىپ, حالىققا تارالۋىنا اتسالىسىپ جۇرگەن جاستار «ءاز بابا» ۇيالى تەلەفونىنىڭ ەكىنشى جاڭارعان نۇسقاسىن دا ازىرلەۋدى جوسپارلاپ وتىر. «ەندى ءبىز «ءاز بابا» سەنسورلى تەلەفونىنىڭ جاڭارتىلعان ۇلگىسىن جاساماقپىز. اسىرەسە, كەلەسى نۇسقاسىن ويۋ-ورنەكتەرمەن اشەكەيلەۋدى كوزدەپ وتىرمىز», – دەيدى قىتاي ەكونوميكا ۋنيۆەرسيتەتىنىڭ تۇلەگى قايىرىمبەك كاكىم.
«ەگەمەن-اقپارات».