تەننيستەن مونتە-كارلودا ءوتىپ جاتقان ATP Masters 1000 ءتۋرنيرىنىڭ ەكىنشى كەزەڭىندە الەكساندر بۋبليك يسپانيالىق پابلو كاررەنو-بۋستامەن كۇش سىناستى.
جۇلدە قورى 5 415 410 ەۋرونى قۇرايتىن جارىستىڭ تۇساۋكەسەر كەزدەسۋىندە ەلىمىزدىڭ ءبىرىنشى راكەتكاسى شۆەيتساريالىق اتاقتى ستەن ۆاۆرينكانى قاپى قالدىرىپ, ءوز جانكۇيەرلەرىن قۋانتقان ەدى. ەكىنشى كەزەڭدە الەكساندردىڭ جولى تاعى ءبىر مىقتى ويىنشىمەن قيىستى. 30 جاستاعى پابلو اقش-تىڭ اشىق بىرىنشىلىگىندە ەكى رەت جارتىلاي فينالعا دەيىن جەتىپ, تاعى ەكى مارتە رولان گارروستىڭ شيرەك فينالىندا باق سىنادى. قازىرگى كەزدە يسپانيانىڭ وكىلى اتر رەيتينگىندە 18-ورىندى يەلەنۋدە.
باسەكەنى بۋبليك جاپ-جاقسى باستاپ, ءبىرىنشى سەتتە 6:4 ەسەبىمەن جەڭىسكە جەتتى. كەلەسىسى تاي-برەيككە دەيىن ۇلاسىپ, بۇل جولى كاررەنو-بۋستانىڭ باعى جاندى – 6:7. شەشۋشى ساتتە 3:4 ەسەبىمەن ۇتىلىپ جاتقان جەرلەسىمىز جارىستى ودان ءارى جالعاستىرۋدان باس تارتتى.